საქართველოს პარლამენტის თავმჯდომარის განცხადებით, ქართული ოცნება საპრეზიდენტო კანდიდატზე სავარაუდოდ, 8 სექტემბრის შემდეგ განაცხადებს.

მისი თქმით, ამ დროისთვის სხვა პარტიების მიერ კანდიდატების დასახელება დასრულებული იქნება.

"ქართული ოცნების პოზიცია ალბათ, გაჟღერდება მას შემდეგ, რაც დასრულდება კანდიდატების დასახელება ანუ 8 სექტემბრის შემდეგ, სავარაუდოდ და ეს ასე მოხდება. ეს არის ჩემი პირადი პოზიცია", -განაცხადა პარლამენტის თავმჯდომარემ, ირაკლი კობახიძემ ჟურნალისტებთან საუბრისას.

იდეა, რომ ქართულ ოცნებას საპრეზიდენტო კანდიდატი არ ჰყავდეს, პარტიის თავმჯდომარეს ბიძინა ივანიშვილს ეკუთვნის. მან პირველ არხთან ინტერვიუში განაცხადა, რომ ეს პოზიცია კონსულტაციების დაწყების პირველი დღიდან ჰქონდა.

ბიძინა ივანიშვილს დაეთანხმა საქართველოს პრემიერ-მინისტრი მამუკა ბახტაძე და განაცხადა, რომ უფრო დემოკრატიული იქნებოდა, თუ ქართულ ოცნებას საპრეზიდენტო არჩევნებში კანდიდატი არ ეყოლებოდა.

გავრცელებული ინფორმაციით, ქართულმა ოცნებამ არჩევნებში მხარი შესაძლოა დამოუკიდებელ კანდიდატს სალომე ზურაბიშვილს დაუჭიროს, თუმცა მამუკა ბახტაძემ განაცხადა, რომ გუნდში არსებობს პოზიცია საპრეზიდენტო კანდიდატის აუცილებლად დაყენებასთან დაკავშირებით.