დღეს, აშშ-ის მთავრობის ათასწლეულის გამოწვევის კორპორაციის ვიცე პრეზიდენტმა, სინტია ჰუგერმა, ილიაუნისა და სან დიეგოს სახელმწიფო უნივერსიტეტის ერთობლივი ახალი კორპუსი დაათვალიერა. სინტია ჰუგერი თბილისში სამუშაო ვიზიტის ფარგლებში, ათასწლეულის გამოწვევის ფონდი - საქართველოს საგანმანათლებო პროექტების შედეგებს და მიმდინარე საქმიანობას ეცნობა. ვიცე პრეზიდენტი ჰუგერი ამ პოზიციაზე მის პირველ საერთაშორისო ვიზიტს საქართველოში მართავს.

ოთხსართულიანი, 4750 კვადრატული მეტრის ახალი საგანმანათლებლო შენობა ვაკის პარკთან, ჩოლოყაშვილის ქუჩაზე, SDSU საქართველოსა და ილიას სახელმწიფო უნივერსიტეტის თანამშრომლობის ფარგლებში აშენდა. ახალი კორპუსი სტუდენტების მისაღებად 2019 წლის სასწავლო წლიდან იქნება მზად, თუმცა შენობის სრული აღჭურვა 2018 წლის ბოლოს დასრულდება.

შენობა უახლესი ტექნოლოგიებით იქნება აღჭურვილი. მასში განთავსდება საერთაშორისო სტანდარტების ელექტრული ინჟინერიისა და სამშენებლო ინჟინერიის ლაბორატორიები, საკლასო ოთახები და სამუშაო სივრცეები.

შენობის დათვალიერების პროცესს ილიაუნის რექტორი და ადმინისტრაციის თანამშრომლები მასპინძლობდნენ. გიგა ზედანიამ აღნიშნა, რომ აღნიშნულ პროექტს უნივერსიტეტის განვითარების პროცესში უდიდესი მნიშვნელობა ენიჭება. მისი თქმით, ახალი კორპუსი მთლიანად ტექნოლოგიური და საბუნებისმეტყველო მეცნიერებების სტუდენტებისთვის იქნება დათმობილი.

"შემდეგი წლიდან სტუდენტებს შესაძლებლობა ექნებათ, სრულიად ახალი ლაბორატორიებით აღჭურვილი კორპუსი გამოიყენონ სასწავლო პროცესში. ეს კორპუსი მთლიანად დაეთმობა საბუნებისმეტყველო და ტექნოლოგიური მეცნიერებების დისციპლინებს. აქ განთავსდება სამოქალაქო, ელექტრონული და კომპიუტერული ინჟინერიის ლაბორატორიები. ჩვენ გვჯერა, რომ ეს იქნება დიდი გადადგმული ნაბიჯი ამ სფეროების გასავითარებლად", - თქვა გიგა ზედანიამ.

მიმდინარე სამუშაოები მოიწონა სინტია ჰუგერმაც. როგორც ათასწლეულის განვითარების კორპორაციის ვიცე პრეზიდენტმა აღნიშნა, ამ კორპუსის აშენება სამომავლო წარმატებების საწინდარი იქნება, რადგან სტუდენტები თანამედროვე ტექნოლოგიებით აღჭურვილ გარემოში შეძლებენ განათლების მიღებას.

"ჩვენი კორპორაცია ამ პროექტის თანადამფინანსებელია, რითიც ძალიან ვამაყობთ. გვიხარია, რომ შენობაში ასეთი კეთილმოწყობილი აუდიტორიები და ლაბორატორიები იქნება, რომლითაც ყველა სტუდენტი ისარგებლებს. ამ შენობაში უამრავი წარმატებული პროექტი შეიქმნება და სწორედ ამიტომ, გვიხარია რომ ჩვენი პარტნიორობა შედგა", - განაცხადა სინტია ჰუგერმა.

ათასწლეულის გამოწვევის კორპორაციის აღმასრულებელმა დირექტორმა საქართველოში, მაგდა მაღრაძემ, განმარტა, რომ ილიაუნისა და სან დიეგოს უნივერსიტეტის ერთობლივი შენობა უნიკალურია თავისი მასშტაბითა და მნიშვნელობით.

"ამ კამპუსში სან დიეგოს სახელმწიფო უნივერსიტეტისა და ილიაუნის სტუდენტებს საშუალება ექნებათ მიიღონ ამერიკული განათლება, მიღებული ცოდნა კი პრაქტიკაში გამოიყენონ. ეს შენობა უნიკალური იქნება არამხოლოდ საქართველოში, არამედ მთელს სამხრეთ კავკასიაში, რადგან აქ განთავსებული ტექნოლოგიები იქნება საერთაშორისო სტანდარტის", - თქვა მაგრა მაღრაძემ.

ილიაუნისა და სან დიეგოს სახელმწიფო უნივერისიტეტის ერთობლივი კორპუსის აშენებაზე 5 მლნ დოლარი დაიხარჯა. ამ თანხის ნაწილი აშშ-ის მთავრობამ, ხოლო მეორე ნაწილი ილიაუნიმ დააფინანსა. აღნიშნული შენობა პირველი კორპუსია საბჭოთა კავშირის დაშლის შემდეგ, რომელიც სახელმწიფო უნივერსიტეტმა საქართველოში ააშენა.