დღეს, 2 აგვისტოს შეწყალების კომისიის თავმჯდომარემ ზვიად ქორიძემ ბრიფინგი გამართა, სადაც თქვა, რომ პრეზიდენტმა გიორგი მარგველაშვილმა 83 მსჯავრდებული შეიწყალა. მისი თქმით, მათგან 40 დღესვე დატოვებს სასჯელაღსრულების დაწესებულებას. დარჩენილ 43 პატიმარს შეუმცირდა სასჯელის ვადა. ზვიად ქორიძის ცნობით, მათ შორისაა ერთი უვადო პატიმარი, რომელსაც პრეზიდენტმა დაუდგინა გათავისუფლების კონკრეტული თარიღი.

შეწყალებულთა შორის არის სამი ქალი და ერთი არასრულწლოვანი მსჯავრდებული. ზვიად ქორიძის თქმით, პრეზიდენტმა ჯამში 976 მსჯავრდებულის საქმე განიხილა.

კომისიის თავმჯდომარემ აღნიშნა ისიც, რომ შეწყალებულთა შორის არ განუხილავთ ე.წ. ციანიდის საქმეზე მსჯავრდებულ დეკანოზის, გიორგი მამალაძის საქმე. ქორიძის განცხადებით, მამალაძის ადვოკატებს შეწყალების თხოვნით არ მიუმართავთ პრეზიდენტისთვის.