"მსგავსი ჩარევა სხვა ადგილობრივი ეკლესიის მხრიდან, რომელიც არ უნდა იყოს, ჩვენთვის წარმოუდგენელია და მიგვაჩნია ეს სრულიად შეუძლებლად. უცნობია ამ გავრცელებული ინფორმაციის საფუძველი," — განუცხადა "ტაბულას" საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ რუსეთის ფედერაციის დაზვერვის სამსახურის (СВР) მიერ გავრცელებულ განცხადებაზე, რომლის მიხედვითაც დაზვერვას აქვს ინფორმაცია, მსოფლიო პატრიარქის სავარაუდო ჩარევის შესახებ საქართველოს პატრიარქის არჩევნებში.

ცნობისთვის, რუსეთის ფედერაციის საგარეო დაზვერვის სამსახურმა (СВР) საქართველოს კათოლიკოს-პატრიარქის არჩევასთან დაკავშირებით განცხადებას გაავრცელა, რომლის მიხედვითაც ბართლომე საქართველოს პატრიარქის კანდიდატებად დასავლეთ ევროპის მიტროპოლიტ აბრაამს და ფოთისა და ხობის მიტროპოლიტ გრიგოლს განიხილავს, რაც ქართული ეკლესიის შიდა საქმეებში ჩარევაა.

СВР-ს პრესსამსახური იუწყება, რომ საგარეო დაზვერვის სამსახურის მიერ მიღებული ინფორმაციის თანახმად, კონსტანტინოპოლის პატრიარქი ბართლომე მსოფლიო მართლმადიდებლობაში დაჟინებით აგრძელებს გახლეჩის მზაკვრულ ხაზს "გათიშე და იბატონეს" პრინციპით.

"თავისი ქმედებებით ბართლომე კვლავ ცვლის "პატივის პრიმატს" "ძალაუფლების პრიმატით", ერევა ერთ-ერთ უძველეს ქართული მართლმადიდებლური ეკლესიის შიდა საქმეებში. ცხადია, როგორც უკრაინის, სერბეთისა და ბალტიისპირეთის ქვეყნების შემთხვევაში, მას დაავიწყდა მეორე საეკლესიო კრების მეორე კანონი: "რეგიონული ეპისკოპოსები არ უნდა ავრცელებდნენ თავიანთ უფლებამოსილებას საკუთარი რეგიონის გარეთ მდებარე ეკლესიებზე...", — წერია რუსეთის საგარეო დაზვერვის სამსახურის პრესცენტრის განცხადებაში.