როგორც მის ერთ-ერთ ცნობილ სიმღერაშია, ახალი დღე დადგა — და ამ დღემ ძალზედ სასიხარულო ცნობა მოგვიტანა. ეს დღე კი სელინ დიონის 58-ე იუბილე აღმოჩნდა. სწორედ საკუთარ დაბადების დღეზე დააანონსა ლეგენდარულმა კანადელმა მომღერალმა სცენაზე დაბრუნება ხანგრძლივი პაუზის შემდეგ. სანამ ანონსი მთელ ინტერნეტსივრცეს მოიცავდა სინათლის სიჩქარით, მანამდე ამბავი პარიზელებმა შეიტყვეს — ეიფელის კოშკიდან დიონის ყველაზე ცნობილი ჰიტები გაჟღერდა, მერე კი ეკრანზე თავად პოპვარსკვლავი გამოჩნდა და საფრანგეთის დედაქალაქს საშემოდგომოდ კონცერტებს დაჰპირდა...

"ბოლო რამდენიმე წლის განმავლობაში, ყოველდღიურად ვგრძნობდი თქვენს მხარდაჭერას, ლოცვებს, კეთილშობილებასა და სიყვარულს", — ამბობს სელინი ვიდეოში, — "სიტყვებით ვერ გადმოვცემ, რამდენად დამეხმარეთ და როგორ გაიმართლა, რომ გვერდში ასე მედექით. წელს კი, დაბადების დღეზე საუკეთესო საჩუქარს ვიღებ. შესაძლებლობა მეძლევა, გნახოთ და სექტემბრიდან ისევ წარვდგე თქვენ წინაშე პარიზში. თავს კარგად და მხნედ ვგრძნობ, აღტაცებული ვარ. ცხადია, ცოტათი ვნერვიულობ კიდეც, მაგრამ ყველაზე მეტად მადლიერებით ვარ სავსე. ყველანი მიყვარხართ. მალე შეგხვდებით".

12 სექტემბრიდან 14 ოქტომბრის ჩათვლით, დიონი პარიზში ათ კონცერტს გამართავს. ბილეთები 10 აპრილიდან გაიყიდება, თუმცა, თუკი სელინის წინა კონცერტებს გავიხსენებთ და ფანების განსაკუთრებულ მოლოდინსაც მივიღებთ მხედველობაში, სრულად ამოყიდვას დიდი დრო არ დასჭირდება. 2019 წელს, როცა პოპვარსკვლავი ტურნეს მართავდა, პარიზის კონცერტზე დასასწრები 200 ათასი ბილეთი საათ-ნახევარში გაიყიდა.

ფოტო: Getty Images

სელინ დიონმა კონცერტი ბოლოს ექვსი წლის წინ გამართა. მას შემდეგ მუსიკოსს მოუწია, გამოსვლები რამდენჯერმე გადაედო. 2022 წლის მიწურულს კი დიონმა განაცხადა, რომ გაშეშებული ადამიანის სინდრომი (Stiff Person Syndrome) დაუდგინდა. ეს იშვიათი ნევროლოგიური დაავადება, რომელიც მილიონში ერთ ადამიანს ემართება, თანდათან პროგრესირებს და იწვევს ტკივილს, კრუნჩხვებს და კუნთოვან გაშეშებას. ამ დაავადებასთან ერთად ცხოვრების რთული მომენტები ვიხილეთ სელინზე გადაღებულ ბიოგრაფიულ ფილმში I Am: Celine Dion, რომელიც 2024 წელს გამოვიდა.

"ხოხვაც რომ მომიწიოს, სცენას მაინც დავუბრუნდები; ხელებით ლაპარაკიც რომ დამჭირდეს, მაინც. ამას ვიზამ", — განაცხადა დიონმა 2024 წელს და ეს დაპირება შეასრულა კიდეც რამდენიმე კვირაში: მან პარიზის ოლიმპიადის გახსნაზე იმღერა.

დიონი, რომელმაც 1988 წლის ევროვიზიაზე შვეიცარიის სახელით გაიმარჯვა, გასული წლის ევროფესტივალზეც იყო მიწვეული, მაგრამ ჯანმრთელობის მდგომარეობის გამო ბაზელში ჩასვლა ვერ შეძლო.

20 წლის ასაკში ევროვიზიის მოგების შემდეგ, სელინ დიონმა მსოფლიოს ყველაზე დიდი სცენები დაიპყრო და მუსიკის ნამდვილ ლეგენდად იქცა. 200 მილიონზე მეტი გაყიდული ჩანაწერით, იგი ყველა დროის ყველაზე პოპულარულ კანადელ და ფრანგულენოვან შემსრულებლადაც მიიჩნევა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...