"მას არ დარჩა არჩევანი, ის უნდა წასულიყო და წავიდე კიდეც", - ასე გამოეხმაურა ყოფილი პრემიერ-მინისტრი და ქართული ოცნების პოლიტსაბჭოს თავმჯდომარე ბიძინა ივანიშვილი გიორგი კვირიკაშვილის გადადგომას პრემიერობის თანამდებობიდან.

ივანიშვილი ამბობს, რომ კვირიკაშვილს აღარ შეეძლო მართვა და მხოლოდ ზურაბ ალავიძესთან და დიმიტრი ქუმსიშვილთან შეეძლო გადაწყვეტილებების შეთანხმება.

"ირღვეოდა ბალანსი სახელმწიფო ინტერესებსა და ბიზნესის ინტერესებს შორის და არღვევდა მას კვირიკაშვილი თავისი ქმედებებით", - ამბობს ივანიშვილი გადაცემა აქტუალური თემის ანონსში. გადაცემის სრული ჩანაწერი დღეს, 24 ივლისს, 21:45 საათზე პირველი არხის ეთერით გავა.

ქართული ოცნების მმართველობის პერიოდში მესამე პრემიერ-მინისტრი, გიორგი კვირიკაშვილი 13 ივნისს გადადგა. კვირიკაშვილის ადგილი კი იმ დროს ფინანსთა მინისტრმა მამუკა ბახტაძემ დაიკავა.

საქართველოს მთავრობის გადადგომის მოთხოვნით თბილისში აქციები დაახლოებით ერთი თვის განმავლობაში იმართებოდა. თავდაპირველად, ეს მოთხოვნა კლუბებში ბასიანსა და გალერიში სპეცოპერაციის ჩატარების შემდეგ გაჩნდა. მოგვიანებით, თბილისის საქალაქო სასამართლომ ხორავას ქუჩაზე მოკლული ორი არასრულწლოვნის საქმეზე გადაწყვეტილება მიიღო, რომლითაც დადგინდა, რომ პროკურატურას დავით სარალიძის მკვლელი დაკავებული არ ჰყავდათ. ამ აქციაზეც გაჟღერდა იგივე მოთხოვნა.

ბოლო ერთი თვის განმავლობაში საქართველოში 10-მდე აქცია ჩატარდა. ყველა შემთხვევაში ისმოდა მთავრობის გადადგომის მოთხოვნა.

მანამდე გიორგი კვირიკაშვილმა განაცხადა, როგორც კი დარწმუნდება, რომ მისი გადადგომა "ქვეყანას წაადგება", თანამდებობას დატოვებს.