ფინანსთა მინისტრის მოვალეობის შემსრულებელი მამუკა ბახტაძე უმრავლესობამ პრემიერ-მინისტრობის კანდიდატად დაასახელა.

პროცედურულად, ქართულმა ოცნებამ მამუკა ბახტაძის კანდიდატურა პრეზიდენტს, გიორგი მარგველაშვილს დასამტკიცებლად უნდა წარუდგინოს, რომელსაც იგი უკვე პარლამენტს გადაუგზავნის განსახილველად.

შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტდეს.

მამუკა ბახტაძის რეზიუმეს მიხედვით, ის არის ტექნიკურ მეცნიერებათა დოქტორია, დაამთავრა ივანე ჯავახიშვილის სახელობის თბილისის სახელმწიფო უნივერსიტეტი და საქართველოს ტექნიკური უნივერსიტეტი, ფლობს ლომონოსოვის სახელობის მოსკოვის სახელმწიფო უნივერსიტეტის მაგისტრის ხარისხს, 2010 წელს, INSEAD-ის ბიზნეს სკოლაში მიენიჭა MBA-ის კვალიფიკაცია

36 წლის მამუკა ბახტაძეს ფინანსთა მინისტრის თანამდებობა 2017 წლის 13 ნოემბრიდან 2018 წლის 13 ივნისამდე ეკავა. მანამდე, 2013-2017 წლებში საქართველოს რკინიგზის გენერალური დირექტორი იყო.

მიუხედავად სოციალურ ქსელებში დარეკლამებული პოსტებისა, რამდენიმე თვის წინ გამოქვეყნებული კვლევების თანახმად, მოსახლეობის ნახევარმა არ იცის, ვინ არის მამუკა ბახტაძე.

IRI-ის კვლევის მიხედვით, გამოკითხულთა 55 პროცენტს მამუკა ბახტაძის სახელი არ სმენია. მისი მუშაობა გამოკითხულთა მხოლოდ 9 პროცენტისთვის იყო მოსაწონი, 22 პროცენტი კი ბახტაძეს უარყოფითად აფასებდა.

NDI-ს 2018 წლის კვლევის მიხედვით, ვინ იყო ბახტაძე მოსახლეობის 43 პროცენტმა არ იცოდა. ასევე, მოსახლეობის 5 პროცენტს მის მიმართ უარყოფითი დამოკიდებულება ქონდა, დადებითად კი 9 პროცენტი აფასებდა.

მამუკა ბახტაძის მინისტრად დანიშვნის შემდეგ სოციალურ ქსელებში მისი ფეისბუქპოსტების, ფეისბუქგვერდისა და ინსტაგრამზე განთავსებული ფოტოების რეკლამები გავრცელდა. ბახტაძე პოსტებს მუდმივად არეკლამებს.

ფინანსთა სამინისტროს მიერ On.ge-სთვის მიწოდებული ინფორმაციის მიხედვით, გვერდების სოციალურ ქსელებში რეკლამისთვის ბიუჯეტიდან თანხა არ იხარჯება.

გაიგე მეტი: