გლდანში, შეშელიძის ქუჩაზე ბეკოს მაღაზია გაძარცვეს. შინაგან საქმეთა სამინისტროს ინფორმაციით, 22 ივლისს, 05:35 წუთზე სამმა პირმა მეტრო ახმეტელის თეატრის მიმდებარედ არსებული ტექნიკის მაღაზია ბეკოდან მობილური ტელეფონები მოიპარა და მიიმალნენ.

უწყების ცნობით, მიმდინარეობს დანაშაულის ჩამდენ პირთა იდენტიფიკაციისთვის შესაბამისი საგამოძიებო ღონისძიებები.

გამოძიება სისხლის სამართლის კოდექსის 177- ე მუხლის მე-2 ნაწილის ა და ბ ქვეპუნქტებით მიმდინარეობს, რაც თავისუფლების აღკვეთით ვადით 3-იდან 5 წლამდე ისჯება.

შსს-ს განცხადებაში ვკითხულობთ, რომ ბოლო პერიოდში ბეკოს ზემოხსენებულ მაღაზიის გაქურდვის ფაქტებზე გლდანის პოლიციაში კიდევ ორ ფაქტზე მიმდინარეობს გამოძიება.

"ორივე შემთხვევაში დადგინდა დანაშაულის ჩამდენ პირთა ვინაობა და მხილებული არიან არასრულწლოვნები. ჩატარდა მათი გამოკითხვები და გრძელდება საგამოძიებო მოქმედებები მათთვის სისხლისსამართლებრივი პასუხისმგებლობის დაკისრების მიზნით", - ნათქვამია განცხადებაში.

უწყების ინფორმაციით, ნაქურდალი ტექნიკის ნაწილი ამოღებულია და დალუქულია, საგამოძიებო პროცედურების დასრულების შემდეგ, ისინი კანონიერ მფლობელს დაუბრუნდება.