2 და 16 ივნისს მოსული ძლიერი წვიმის შედეგად მარნეულში საცხოვრებელი სახლები დაიტბორა და მოსახლეობა დაზარალდა. სტიქიის შემდეგ მარნეულის მუნიციპალიტეტის მერიაში ზარალის დამთვლელი კომისია შეიქმნა, თუმცა ზარალის ზუსტი ოდენობა დღემდე დადგენილი არ არის. მერიაში ჯერ არც ის არის გარკვეული, რა ფორმით დაეხმარებიან დაზარალებულებს.

2 ივნისს მარნეულში მოსული ძლიერი წვიმის შედეგად ვაჟა-ფშაველას, აღმაშენებლის, სულხან საბას, ლესელიძისა და ქობულეთის ქუჩებზე მცხოვრები მოსახლეობის საცხოვრებელი სახლები დაიტბორა. ძლიერი წვიმა მოვიდა 16 ივნისსაც. ამჯერად უკვე ეზოები და სავარგულები დაიტბორა. განსაკუთრებით დაზარალდა ქობულეთის ქუჩაზე მცხოვრები მოსახლეობა.

ფოტო: თბილისის ადამიანის უფლებათა სახლი

58 წლის ასქერ სულეიმანოვის ოჯახი 2 ივნისს დაზარალდა. "სახლიდან წყლის ამოტუმბვას ჩვენი ძალებით ვცდილობდით, მაგრამ ვერ შევძელით. ყველაფერი გაფუჭდა და გადასაყრელია. 112-ში დავრეკეთ, მაგრამ ჩვენს დასახმარებლად არავინ მოვიდა" , - ამბობს ასქერ სულეიმანოვი.

ზარალი მიადგა საბირ დალივაროვის ოჯახსაც. სტიქიის შედეგად მისი სახლიც დაიტბორა: "მე ხელოსანი ვარ. ჩემი სამუშაო იარაღების ნაწილი წყალმა წაიღო, ნაწილი კი გაანადგურა. ბევრი ნივთი უკვე გადავყარე. ამ იარაღებით ვშოულობდი ფულს და შვილებს და შვილიშვილებს ვარჩენდი. ვინ ამინაზღაურებს ამ ზარალს? სტიქიის დღეს დახმარების ხელი არავინ გამოგვიწოდა", - ამბობს დალივაროვი.

ზოია კიკნაძე ოჯახის შვიდ წევრთან ერთად ერთ სახლში ცხოვრობს. ის ამბობს, რომ წყალდიდობის დღეს მათი სახლიც დაიტბორა და თითქმის ყველაფერი დაზიანდა. მიუხედავად იმისა, რომ სტიქიის დროს შველას ითხოვდნენ, მათ დასახმარებლად არავინ მივიდა.

"წყალი რომ მოვარდა, კარს მთელი ძალით ვიჭერდი, რომ სახლში არ შემოსულიყო. დინება იმდენად ძლიერი იყო, კარი შემოამტვრია და სახლი წყლით აივსო. ბავშვი მაგიდაზე დავსვით. ჩვენ კი წყლით სავსე სახლში ვიჯექით და დახმარებას ველოდებოდით. 112-შიც დავრეკეთ. ვუთხარი, რომ სახლში ფეხმძიმე ქალი და ჩვილი ბავშვი იყვნენ, მაგრამ ეს არავინ გაითვალისწინა და დასახმარებლად არავინ მოვიდა. დატბორვის გამო ახლა სახლი ისეთ მდგომარეობაშია, აქ პატარა ბავშვთან ერთად ცხოვრება აღარ შეიძლება", - ამბობს ზოია კიკნაძე.

მარნეულის მერიაში სტიქიის შედეგების სალიკვიდაციო კომისია შეიქმნა. პირველ ეტაპზე მათ სახიფათო ზონებიდან 50-მდე ადამიანი გაიყვანეს. ერთი ოჯახის გარდა ყველა მათგანი საკუთარ საცხოვრებელ სახლში უკვე დაბრუნდა. როგორც მარნეულის მუნიციპალიტეტის მერიაში განაცხადეს, ზეინალოვების 8-სულიანი ოჯახისთვის, რომელთა სახლიც 2 ივნისს მოსული ძლიერი წვიმის შემდეგ საცხოვრებლად უვარგისია, ბინას მერია ქირაობს.

ადგილობრივი მოსახლეობისთვის სტიქიით მიყენებული ზარალის ზუსტი ოდენობა ამ დროისთვის დადგენილი არ არის. ჯერჯერობით არც ის არის გარკვეული, დაზარალებულები ფულად კომპენსაციას მიიღებენ თუ მატერიალურ დახმარებას. მარნეულის მუნიციპალიტეტის მერიის ერთ-ერთი მაღალჩინოსნის თქმით, დაზარალებულებს, შესაძლოა სამშენებლო მასალებით დაეხმარონ.

ავტორი: ნურანა მამმადი

სტატია მომზადებულია "თბილისის ადამიანის უფლებათა სახლის" პროექტის ფარგლებში, რომელიც საქართველოში ნიდერლანდების სამეფოს საელჩოსა და ფონდის - "ეროვნული წვლილი დემოკრატიისათვის" ფინანსური მხარდაჭერით ხორციელდება. ავტორის/ავტორების მიერ სტატიაში გამოთქმული მოსაზრება, შესაძლოა, არ გამოხატავდეს დონორთა და თბილისის ადამიანის უფლებათა სახლის პოზიციას.