ადამიანის უფლებების სწავლებისა და მონიტორინგის ცენტრმა (EMC) სახალხო დამცველს მიმართა ვეგანური კაფე კივის ადმინისტრაციის სახელით, რომ რეაგირება მოახდინოს დისკრიმინაციის ყველა ფორმის აღმოფხვრის შესახებ კანონის საფუძველზე.

განცხადებაში EMC აცხადებს, რომ კაფის ფართის მესაკუთრის მხრიდან ადგილი ჰქონდა რამდენიმე ნიშნით, მათ შორის, განსხვავებული შეხედულობის, ასევე ჰომოფობიური დამოკიდებულების გამო დისკრიმინაციულ მოპყრობას, რასაც მოჰყვა ფართით სარგებლობის და ქირავნობის ხელშეკრულების უკანონო შეწყვეტა.

EMC სახალხო დამცველის აპარატს მიმართავს და დისკრიმინაციის ყველა ფორმის აღმოფხვირის შესახებ კანონით გათვალისწინებული მედიაციის ინსტრუმენტის ფარგლებში, კაფის ფართის გასათავისუფლებლად დამატებითი ვადის განსაზღვრას სთხოვს.

EMC-ის ინფორმაციით, 2016 წლის 29 მაისს, კაფე კივის პერსონალის მიმართ ნეონაცისტური დაჯგუფებისა და შემდგომში ადგილობრივი მაცხოვრებლების მიერ განხორციელებული ძალადობისა და იძულების შემდეგ, რომელშიც ასევე მონაწილეობდა ფართის მესაკუთრის შვილი, მესაკუთრემ დამქირავებელს ქირავნობის ხელშეკრულების ვადამდე ადრე (ხელშეკრულების ვადა 2017 წლის ბოლოს იწურებოდა) შეწყვეტა და ერთ თვეში სივრცის დაცლა მოსთხოვა.

ფართის მეპატრონის მოთხოვნასთან დაკავშირებით, სახალხო დამცველი ჩაერთო საქმეში და მედიაციის ფარგლებში გამართული მოლაპარაკების შემდეგ კაფის ადმინისტრაციას ფართის დასაცლელად ორკვირიანი დამატებითი ვადა განესაზღვრა.

EMC-ის პოზიცია

"განსხვავებული შეხედულებისა და არანორმატიული გარეგნობის გამო ფართის მესაკუთრის მხრიდან, რომელმაც საკუთრების უფლებით სარგებლობა შეუზღუდა კაფის ადმინისტრაციას, იყო დისკრიმინაციული მოპყრობა.

ნეონაცისტური ჯგუფის თავდასხმამ მეზობლებისა და მესაკუთრის დევნისა და დისკრიმინაციის პროვოცირება მოახდინა და მანამდე შედარებით დაფარულად არსებული მიუღებლობის გამოვლენა დააჩქარა.

თავდასხმის შემდეგ კაფის პერსონალისა და სტუმრების მიმართ ფართის მესაკუთრე ხშირად იყენებდა დისკრიმინაციული და დამაკნინებელი შინაარსის ფრაზებს:

"თქვენი გარეგნობა არმოსწონთ, საქართველოში არ არის ჯერ ესე, შენ რაც გინდა ის იყავი, მაგრამ ჩემს სახლში არ მინდა იყო; "თქვენ როგორც გაცვიათ ჩემთვის ეს ნიშნავს, რომ ტიტვლები ხართ"; არ გვინდა ჩვენმა შვილებმა, შვილიშვილებმათქვენნაირ ხალხს უყურონ" და სხვა.

გასათვალისწინებელია, რომ ხელშეკრულების შეწყვეტამდე ფართის მესაკუთრემ, მეზობლების მხრიდან კაფის პერსონალისა და სტუმრების მიუღებლობის მოტივით მთელი რიგი სხვა შეზღუდვები დაუწესა კაფის ადმინისტრაციას, მათ შორის, აიძულა აეღო კაფის წინ ეზოში მდგარი მაგიდები.

დაფიქსირდა მეზობლების მხრიდან პროვოკაციული ქცევისა და სიმბოლურ დონეზე ვეგანური მსოფლმხედველობის დემონსტრაციული შეურაცხყოფის ფაქტებიც.

ძალადობისგან, ქსენოფობიისა და ჰომოფობიისგან თავისუფალი, პლურალური საზოგადოების განვითარებისთვის მნიშვნელოვანია დისკრიმინაციისა და სიძულვილის მსგავს გამოვლინებებზე სათანადო რეაგირება და მათთვის ადეკვატური სამართლებრივი შეფასების მიცემა".

კაფე კივის მწვანე და ვეგანური (ცხოველების მიმართ ძალადობისა და მათი ექსპლუატაციის საწინააღმდეგო ფილოსოფია) იდეოლოგიური პლატფორმა აქვს და სოციალური კაფის, ასევე აქტივისტური და სადისკუსიო სივრცის ფუნქციას ასრულებს.