სამოქალაქო პლატფორმა - არა ფობიას ვეგანურ კაფე Kiwi-ში მომხდარ ინციდენტს ეხმაურება და განმარტავს, რომ ბოლო დროს აგრესიული ულტრანაციონალისტური დაჯგუფებების ქმედებებს სამართალდამცავი ორგანოები ირიბად ახალისებენ, რადგან ასეთ ინციდენტებს არასაკმარისი რეაგირება და სრული გულგრილობა მოჰყვება ხოლმე:

"თავდაპირველად პოლიცია მხოლოდ სისხლის სამართლის კანონმდებლობისთვის უცნობი წინასაგამოძიებო მოქმედებებით შემოიფარგლა, თუმცა მედიასა და სოციალურ ქსელებში მწვავე გამოხმაურებების შემდგომ გავრცელდა ინფორმაცია გამოძიების დაწყების შესახებ, ტრადიციისამებრ ცემის მუხლით. გამოძიებას კვლავ არ გამოუყენებია სისხლის სამართლის კოდექსის 53-ე მუხლის მე-31 ნაწილი, მაშინ, როდესაც სახეზეა სიძულვილის აშკარა მოტივი".

სამოქალაქო პლატფორმის წარმომადგენლები მიიჩნევენ, რომ 2016 წლის 26 მაისს ულტრანაციონალისტური მოძრაობის მარშის ვიდეოს გავრცელება მიანიშნებს ამგვარი ჯგუფების გაძლიერებასა და მათგან მომდინარე აგრესიული ქმედებების საშიშროებაზე განსხვავებული იდენტობის მქონე ადამიანების მიმართ.

არა ფობიას განმარტავს, რომ არაერთხელ მიმართა შსს-ს და მოითხოვა დისკრიმინაციისა და სიძულვილის მოტივით განხორციელებულ სამართალდარღვევებზე დროული და ეფექტური რეაგირება, თუმცა უშედეგოდ:

"კიდევ ერთხელ მივმართავთ შინაგან საქმეთა სამინისტროს, დროული და ადეკვატური რეაგირება მოახდინოს აგრესიული დაჯგუფებების კანონსაწინააღმდეგო ქმედებებზე, განსაკუთრებით მაშინ, როდესაც აღნიშნულ ქმედებებს სიძულვილი და შეუწყნარებლობა აქვს მოტივად".

სამოქალაქო პლატფორმას ასევე აუცილებლად მიაჩნია, ყოველ შესაბამის შემთხვევაში, შს მინისტრის 2014 წლის 23 დეკემბერის N47 მითითების მიხედვით, გამოძიებამ, დანაშაულის გარემოებების აღწერის დროს, მიუთითოს საქმეში სისხლის სამართლის კოდექსის 53-ე მუხლის მე-31 ნაწილის (სიძულვილით მოტივირებული დანაშაულის) ნიშნების არსებობის შესახებ.

29 მაისს თბილისში, ვეგანურ კაფე Kiwi-ში, რამდენიმე პირი შეიჭრა და იქ მყოფებს შეურაცხყოფა მიაყენა. აღნიშნულში კივის თანამშრომლები ულტრანაციონალისტური გაერთიანებას ადანაშაულებენ, თუმცა გაერთიანების წევრმა On.ge-სთან საუბარში განაცხადა, რომ კივისთან არანაირი კავშირი არ აქვთ და არც რაიმე იდეოლოგიური პროტესტი გააჩნიათ ვეგანების მიმართ.