სამოქალაქო აქტივისტის, ანა სუბელიანის განცხადებით, იუსტიციის მინისტრობის კანდიდატის, თეა წულუკიანის მიერ მემორიალზე ცეკვის კრიტიკულად ხსენება მის მიმართ სიძულვილს აღვივებს.

"მემორიალზე აპელირება არის ყოვლად სამარცხვინო საქციელი, განსაკუთრებით იმ რეალობაში, როცა ამ დაგეგმილად აგორებული ზიზღის საფუძველზე, მე და ჩემს შვილს გვემუქრებიან, სახელმწიფო უნდა გვიცავდეს, ერთი პირიც არ დასჯილა დღემდე ამ მუქარებისთვის და იუსტიციის მინისტრი ამ დროს ცდილობს თავი დაიძვრინოს ჩემ მიმართ სიძლვილის გაღვივებით."

თეა წულუკიანმა პარლამენტში გაერთიანებული კომიტეტების სხდომაზე განაცხადა, რომ უკვე ბევრჯერ უპასუხა კითხვებს დანაშაულის პრევენციის ცენტრიდან გათავისუფლებულ თანამშრომლებზე "მაგრამ, როგორც ჩანს, ერთ-ერთი კითხვის ავტორი [ანა სუბელიანი] მემორიალზე ცეკვავდა, არ ეცალა და ვერ მოისმინა".

წულუკიანმა ასევე განაცხადა, რომ სააღსრულებო ფურცლის მისვლისთანავე, ანა სუბელიანი და თამაზ ახობაძე მიწვეული იყვნენ სააღსრულებო ბიუროში, სადაც მათ ფულზე დაიწყეს ვაჭრობა.

წულუკიანის ეს განცხადება სუბელიანმა და ახობაძემ გააპროტესტეს და მინისტრი ტყუილში დაადანაშაულეს, რის შემდეგაც მანდატურის სამსახურმა მათ დარბაზი დაატოვებინა. სხდომის დატოვების შემდეგ ახობაძემ განაცხადა, რომ ფულზე ვაჭრობა არასოდეს დაუწყია და მას სთავაზობდნენ ფულს აღდგენის სანაცვლოდ.

სუბელიანისა და ახობაძის საქმე

2014 წელს ანა სუბელიანი და თამაზ ახობაძე სამსახურიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4 წლიანი იძულებითი განაცდურის ანაზღაურება დაეკისრა.