თეა წულუკიანის განცხადებას იმის შესახებ, რომ თამაზ ახობაძე და ანა სუბელიანი "ფულზე ვაჭრობდნენ", დანაშაულის პრევენციის ცენტრიდან გათავისუფლებულები ტყუილს უწოდებენ.

გაერთიანებული კომიტეტის სხდომაზე თეა წულუკიანის განცხადების გაპროტესტებისა და მინისტრის მოვალეობის შემსრულებლის ტყუილში დადანაშაულების შემდეგ თამაზ ახობაძეს და ანა სუბელიანს მანდატურის სამსახურმა დარბაზი დაატოვებინა.

სხდომის დატოვების შემდეგ ახობაძემ განაცხადა, რომ ფულზე ვაჭრობა არასოდეს დაუწყია და მას სთავაზობდნენ ფულს აღდგენის სანაცვლოდ.

"ბოდიშის მოხდაც კი არ უნდა იუსტიციის სამინისტროს, იმისთვის, რომ 4 წელი მაწვალა, რომ ჩემი უფლებები აღმედგინა. გარიგება იყო მათი მხრიდან, რომელზეც ჩვენ არ დავთანხმდით. იუსტიციის სამინისტროს დანაშაულის პრევენციის ცენტრმა მე შემომთავაზა 65 ათასი ლარი იმისთვის, რომ უარი მეთქვა აღდგენაზე, რაზეც არ დავთანხმდით", - განაცხადა ახობაძემ.

ანა სუბელიანის განცხადებით, სამინისტრო უარს ამბობს ოფიციალურ ბოდიშზე, რომელიც დაადასტურებს, რომ მათი უფლებები შეილახა:

"ეს ქალი თუ კიდე გააგრძელებს იუსტიციის სამინისტროს ხელმძღვანელობას, ჩათვალეთ სახელმწიფო აღარ გვაქვს. სასამართლოს ზედ უვლის, პროკურატურა ხელში ყავს და თავისი პირადი მიზნებისთვის იყენებს. ის რასაც წულუკიანი აკეთებს არის პოლიტიკური გადაწყვეტილება, რომ სასამართლო გადაწყვეტილება არ აღასრულოს და ამ მიზნით, ყველა ბერკეტს იყენებს ჩვენს წინააღმდეგ."

ამავე სხდომაზე წულუკიანმა განაცხადა, რომ დანაშაულის პრევენციის ცენტრიდან გათავისუფლებულ თანამშრომლებზე აქამდეც ბევრჯერ ისაუბრა. "როგორც ჩანს, კითხვის ავტორი [ანა სუბელიანი] მემორიალზე ცეკვავდა და არ ეცალა", - განაცხადა წულუკიანმა.

სუბელიანისა და ახობაძის საქმე

2014 წელს ანა სუბელიანი და თამაზ ახობაძე სამსახურიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4 წლიანი იძულებითი განაცდურის ანაზღაურება დაეკისრა.