იუსტიციის მინისტრობის კანდიდატმა, თეა წულუკიანმა განაცხადა, რომ სააღსრულებო ფურცლის მისვლისთანავე, ანა სუბელიანი და თამაზ ახობაძე მიწვეული იყვნენ სააღსრულებო ბიუროში, სადაც მათ ფულზე დაიწყეს ვაჭრობა.

"თქვეს, რომ მოგვეცით უფრო მეტი ფული, მოიხადეთ ბოდიში და აღვასრულებთ, ვიტყვით რომ... დიახ, ფულზე ვაჭრობა იყო."

გაერთიანებული კომიტეტების სხდომაზე წულუკიანის ეს განცხადება სუბელიანმა და ახობაძემ გააპროტესტეს და მინისტრი ტყუილში დაადანაშაულეს, რის შემდეგაც მანდატურის სამსახურმა მათ დარბაზი დაატოვებინა.

ამავე სხდომაზე წულუკიანმა განაცხადა, რომ დანაშაულის პრევენციის ცენტრიდან გათავისუფლებულ თანამშრომლებზე აქამდეც ბევრჯერ ისაუბრა. "როგორც ჩანს, კითხვის ავტორი [ანა სუბელიანი] მემორიალზე ცეკვავდა და არ ეცალა", - განაცხადა წულუკიანმა.

სუბელიანისა და ახობაძის საქმე

2014 წელს ანა სუბელიანი და თამაზ ახობაძე სამსახურიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4 წლიანი იძულებითი განაცდურის ანაზღაურება დაეკისრა.