საქართველოს იუსტიციის მინისტრობის კანდიდატის, თეა წულუკიანს პარლამენტში გაერთიანებული კომიტეტების სხდომაზე კიდევ ერთხელ მოუწია დანაშაულის პრევენციის ცენტრიდან გათავისუფლებულ თანამშრომლებზე საუბარი.

"ფიცი მწამს, ბოლო მაკვირვებს, მაგრამ ამ კითხვას პასუხი უნდა გავცე. ბევრჯერ გავეცი პასუხი, მაგრამ, როგორც ჩანს, ერთ-ერთი კითხვის ავტორი [ანა სუბელიანი] მემორიალზე ცეკვავდა და არ ეცალა", - თქვა წულუკიანმა.

მისი თქმით, სიცრუეა, რომ იუსტიციის სამინისტრო სასამართლოს გადაწყვეტილებებს არ აღასრულებს.

"მათ [ახობაძემ და სუბელიანმა] ვაჭრობა დაიწყეს ფულზე და თქვეს, რომ მოგვეცით უფრო მეტი ფული, მოიხადეთ ბოდიში და აღვასრულებთ..." - თქვა წულუკიანმა და დასძინა, რომ არც ერთი ეს გადაწყვეტილება აღსრულებადი არ არის.

მინისტრობის კანდიდატის განმარტებით, ახობაძის შემთხვევაში სასამართლო გადაწყვეტილება ახალი გადაწყვეტილებით გაბათილდა, რადგან მის ადგილზე უკვე მუშაობს სხვა. წულუკიანმა აღნიშნა, რომ სუბელიანი ისეთ თანამდებობაზე აღდგა დანაშაულის პრევენციის ცენტრში, რომელი თანამდებობაც მანამდე არ არსებობდა და ამ საკითხზე სასამართლო დავა მიმდინარეობს.

სუბელიანისა და ახობაძის საქმე

2014 წელს ანა სუბელიანი და თამაზ ახობაძე სამსახურიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4 წლიანი იძულებითი განაცდურის ანაზღაურება დაეკისრა.

ამავე თემაზე: