პროკურატურის ინფორმაციით, საქართველოს პრეზიდენტის, გიორგი მარგველაშვილისა და საკონსტიტუციო სასამართლოს თავჯდომარის, გიორგი პაპუაშვილის განცხადებებზე უწყებამ გამოძიება უკვე დაიწყო.

როგორც პოკურატურის მიერ გავრცელებულ განცხადებაშია მითითებული, გამოძიება დაწყებულია იმ მიზნით, რომ გაირკვეს, გიორგი მარგველაშვილის სიძის - მინდია გოგოჭურის მიმართ, ხომ არ ჰქონია სამართალდამცავების მხრიდან უფლებამოსილების გადამეტების ფაქტს ადგილი. ამასთან, გაირკვეს, შეესაბამება თუ არა სიმართლეს საკონსტიტუციო სასამართლოს თავჯდომარის, გიორგი პაპუაშვილის განცხადებაში მითითებული ფაქტები სიმართლეს:

"ამავდროულად, საზოგადოებას გვინდა ვაცნობოთ, რომ მთავარი პროკურატურის საგამოძიებო ნაწილში დაიწყო გამოძიება საკონსტიტუციო სასამართლოში სამართალწარმოების განხორციელებაზე ზეგავლენის მიზნით სასამართლოს საქმიანობაში ამა თუ იმ ფორმით უხეში ჩარევის, ასევე პირადი ცხოვრების საიდუმლოს უკანონოდ მოპოვების და გამოყენების შესაძლო ფაქტებზე საქართველოს სისხლის სამართლის კოდექსის 364-ე მუხლის მეორე ნაწილითა და 1571 მუხლის პირველი ნაწილით".

უწყება ასევე განმარტავს, რომ გიორგი პაპუაშვილის საჯარო განცხადების გაკეთებიდან მოკლე ვადაში მას გაუგზავნეს შეთავაზება, პროკურატურაში გამოცხადებისა და მის მიერ გავრცელებული ინფორმაციის დეტალებში გარკვევის მიზნით. პროკურატურის თქმით, მიუხედავად იმისა, რომ თავდაპირველად ამ უკანასკნელმა თანხმობა განაცხადა პროკურატურის შეთავაზებაზე, საბოლოოდ მან შეცვალა პოზიცია, უარი განაცხადა თანამშრომლობაზე და პროკურატურაში გამოცხადებაზე:

"პროკურატურის მიერ დაწყებული გამოძიების ფარგლებში ჩატარდება ყველა აუცილებელი საგამოძიებო მოქმედება საკონსტიტუციო სასამართლოს წევრების მიმართ შესაძლო დანაშაულებრივი ფაქტების გადამოწმების მიზნით".

21 ივლისს საკონსტიტუციო სასამართლოს თავჯდომარემ, გიორგი პაპუაშვილმა განაცხადა, რომ რომ სასამართლოს მოსამართლეებზე და მათ ახლობლებზე ზეწოლა, თვალთვალი და მუქარა მიმდინარეობს.

ხოლო მას შემდეგ, რაც პრეზიდენტი პაპუაშვილს შეხვდა, საგანგებო პრესკონფერენცია გამართა და განაცხადა, რომ პაპუაშვილის მონათხრობმა ის არ გააოცა, რადგან სამართალდამცავების მხრიდან 1 თვის წინ მისი ოჯახის წევრზეც იყო ზეწოლის განხორციელების მცდელობა.