შინაგან საქმეთა სამინისტრო პრეზიდენტის განცხადებას, მისი ოჯახის წევრზე სამართალდამცავების ჩართვით ზეწოლის მცდელობასთან დაკავშირებით ეხმაურება.

შსს მიიჩნევს, რომ გიორგი მარგველაშვილი დღევანდელ განცხადებაში, შესაძლოა, მისი ოჯახის წევრის ბინის ჩხრეკის ფაქტს გულისხმობდა:

"შსს-ს ცენტრალურ კრიმინალურ პოლიციაში მიმდინარეობს გამოძიება სსკ-ს 236-ე მუხლის მეორე და მესამე ნაწილებით (ცეცხლსასროლი იარაღის მართლსაწინააღმდეგო შეძენა-შენახვა-ტარება). ოპერატიული ინფორმაციის საფუძველზე, სამართალდამცველებმა თბილისში, 2016 წლის 28 ივნისს, სამი პირი გაჩხრიკეს, აქედან, ერთ-ერთი პირი იყო პრეზიდენტის მეუღლის შვილთან არარეგისტრირებულ ქორწინებაში მყოფი მამაკაცი. აღნიშნულ პირებს ჩაუტარდათ პირადი ჩხრეკა, რა დროსაც მიხეილ თ.-სა და მინდია გ.-ს რაიმე კანონსაწინააღმდეგო ნივთი არ აღმოაჩნდათ, ხოლო თორნიკე კ. -ს პირადი ჩხრეკისას ამოღებული იქნა ცივი იარაღი. აღნიშნული საგამოძიებო მოქმედება სასამართლოს მიერ კანონიერად იქნა ცნობილი".

შინაგან საქმეთა სამინისტროს ინფორმაციით, სამართალდამცავებმა მინდია გ.-ს კუთვნილი ავტომანქანა და საცხოვრებელი ბინაც გაჩხრიკეს, თუმცა რაიმე კანონსაწინააღმდეგო ნივთი არ აღმოუჩენიათ. შესაბამისად, მისი სისხლისსამართლებრივი პასუხისმგებლობის საკითხი, აღნიშნული გამოძიების ფარგლებში, არ დამდგარა.

შსს აღნიშნავს, რომ ჩატარებული ოპერატიულ-საგამოძიებო ღონისძიება განხორციელდა საქართველოს კანონმდებლობის შესაბამისად, მონაწილე პირთა უფლებების სრული დაცვით და მიზნად ისახავდა შესაძლო დანაშაულის გამოვლენასა და პრევენციას.

დღეს საქართველოს პრეზიდენტმა გიორგი მარგველაშვილმა განაცხადა, რომ სამართალდამცავების მხრიდან 1 თვის წინ მისი ოჯახის წევრზე ზეწოლის განხორციელების მცდელობა იყო.