"ის, რომ მემანქანეებმა გადაწყვიტეს შანტაჟი, არის არასწორი შეფასება", - ასე გამოეხმაურა პრეზიდენტის ადმინისტრაციის მრჩეველი, კახა კოჟორიძე მეტროს მემანქანეების გაფიცვას. მისი თქმით, ხელფასების მომატებაზე პროტესტს ისინი არა ერთი თვის წინ, არამედ 2014 წლიდან გამოხატავენ.

"მთელი ეს პერიოდი, როდესაც ამ ადამიანებმა თავიანთი კონსტიტუციური უფლებით დაიწყეს პოზიციის დაფიქსირება, ჩვენ ცხადია ვადევნებთ თვალს დიდი ინტერესით. შიმშილობა და გაფიცვავ არის, კონსტიტუციურად მათი უფლება. მოლაპარაკებას ამ პროცესში არ აქვს ალტერნატივა. უნდა გაგრძელდეს მოლაპარაკება, რომ ეს ორი მხარე დაახლოვდეს ერთმანეთთან", - ამბობს კოჟორიძე.

მისი თქმით, მეტროს თანამშრომლები უმნიშვნელოვანეს საქმეს აკეთებენ, რომლებმაც დაპირება მიიღეს, რომ 2017 წელს ხელფასები გაეზრდებოდათ, თუმცა ასე არ მოხდა.

კახა კოჟორიძის მისვლამდე ე.წ. გლდანის დეპოში თბილისის საკრებულოსა და პარლამენტის დეპუტატები მივიდნენ და გაფიცულ მემანქანეებს შეხვდნენ.

მეტროს მემანქანეებმა გუშინ, 3 ივნისს შიმშილობა დაიწყეს, რამაც დღეს, 4 ივნისს, მეტროს პარალიზება გამოიწვია. ისინი ხელფასების ზრდას მოითხოვენ.

დღესვე თბილისის მერმა, კახა კალაძემ ბრიფინგი გამართა და განაცხადა, რომ მეტროს მემანქანეების პროტესტი შანტაჟი და ულტიმატუმებით საუბარია საზოგადოებასთან.

კალაძემ წარადგინა ბანკის ამონაწერი, რომელიც მისი თქმით, ასახავს მეტროს მემანქანეების ხელფასს და ის გაცილებით მეტია ვიდრე პედაგოგების, სასწრაფო დახმარებისა და საპატრულო პოლიციის თანამშრომლების ხელფასები. მეტროს მემანქანეებმაც გაასაჯაროვეს დარიცხული ხელფასების მონაცემები, თუმცა რიცხვები ერთმანეთს არ დაემთხვა.

მემანქანეებს გაფიცვის უფლება თბილისის სატრანსპორტო კომპანიამ სასამართლოში ორჯერ გაასაჩივრა. სასამართლოს ბოლო გადაწყვეტილებით, მემანქანეებს გაფიცვის უფლება განუსაზღვრელი ვადით შეუჩერდათ. ამის მიუხედავად მეტრო გაფიცულია.

სატრანსპორტო კომპანია მემანქანეებს კანონის დაცვისკენ მოუწოდებს. მეტროს მემანქანეების გაფიცვის გამო საზოგადოებრივი ტრანსპორტი უფასოდ მოძრაობს.