ოდესმე გიფიქრიათ იმაზე, თუ რამდენია დედამიწაზე მცხოვრები ორგანიზმების ჯამური წონა? არა? მეცნიერებს ამაზე ნამდვილად უფიქრიათ, ხოლო მეცნიერების ეროვნული აკადემიის ნაშრომებში გამოქვეყნებული ახალი კვლევა გასაოცარ პასუხს გვთავაზობს. დედამიწაზე მცხოვრები ორგანიზმების (უმცირესი ბაქტერიებისა და უზარმაზარი ხეების ჩათვლით) ჯამურ წონაში არსებული ნახშირბადის წონა რომ დავთვალოთ, 550 გიგატონას მივიღებთ.

ერთი გიგატონა ერთი ტრილიონი ტონის ტოლია. 550 ცალ გიგატონაში კი ადამიანების წილი 1%-ზე ნაკლებია. მაგალითად, ჩვენ გვისწრებენ თევზები, რომელთა ჯამურ წონაშიც დაახლოებით 0.7 გტ ნახშირბადია, ასევე გვისწრებენ ვირუსებიც - 0.2 გტ ნახშირბადით.

კვლევის თანახმად, ადამიანების ჯამურ წონაში დაახლოებით 0.06 გტ ნახშირბადია. ჩვენ სიდიდით თითქმის ყველაფერი გვისწრებს: ბაქტერიები (70 გტ ნახშირბადი), სოკოები (12 გტ ნახშირბადი), ფეხსახსრიანები (1 გტ ნახშირბადი), მოლუსკები (0.2 გტ ნახშირბადი), ჩვენი პირუტყვიც კი (0.1 გტ ნახშირბადი). ჩვენი და ჩვენი პირუტყვის საშუალო წონა კი მნიშვნელოვნად აღემატება ველური ძუძუმწოვრების წონას (0.007 გტ ნახშირბადი). სინამდვილეში ცხოველთა ჯამურ წონაში 2 გტ ნახშირბადიც კი არაა.

ცხადია, რომ მოცემული მაგალითების ჯამით 550 გტ ნახშირბადი ვერ მივიღეთ. მაშ რა არ გაგვითვალისწინებია? რაღა თქმა უნდა, მცენარეები. მცენარეები პირველ ადგილზე არიან და მათ ჯამურ წონაში 450 გტ ნახშირბადია. იგულისხმება ყველა ხე, თითოეული ფოთოლი, წყალმცენარე, ბუჩქი, ხილი თუ ბოსტნეული და კიდევ მრავალი რამ.

ამ რიცხვების მისაღებად მეცნიერები 3 წლის განმავლობაში ითვლიდნენ ცოცხალი ორგანიზმების ჯგუფის ბიომასას და ამ ინფორმაციას მონაცემთა ბაზაში ინახავდნენ. მეცნიერები თავდაპირველად დედამიწაზე არსებული პროტეინების რაოდენობის გამოთვლას ცდილობდნენ, თუმცა ამ მიზნის მისაღწევად ცოცხალი ორგანიზმების ჯამური წონის დათვლა გახდა საჭირო, რაც მეცნიერული კვლევების რიგითი მოყვარულისათვის უფრო საინტერესო ინფორმაციაა, ვიდრე რაღაც პროტეინების რაოდენობა.

ის, რომ ჩვენ, როგორც სახეობას ძალიან მცირე წილი გვაქვს ცოცხალ ორგანიზმთა ჯამურ წონაში, არ ნიშნავს, რომ ჩვენ გარემოზე უმნიშვნელო გავლენას ვახდენთ. იმის მიუხედავად, რომ ამ კვლევის თანახმად წონით 1%-ზე ნაკლები ვართ, ყველაფერი, რასაც ჩვენ ვქმნით (შენობები, მანქანები და ნებისმიერი ხელნაკეთი ნივთი, ნაგვის ულევი მარაგის ჩათვლით) შეუქცევადად ცვლის ჩვენს პლანეტას.