ამ მომენტში, თბილისის საქალაქო სასამართლოში, პოლიციელებზე თავდასხმაზე ბრალდებული მათე დევიძის სასამართლო პროცესი მიმდინარეობს.

ამასთან, დღევანდელ სხდომაზე დაკავებულის მიმართ შეფარდებული აღკვეთის ღონისძიების პატიმრობის შეფარდებაზე იმსჯელებენ.

პროკურატურა 21 წლის მათე დევიძის მიმართ პატიმრობის გამოყენებას ითხოვს.

შეგახსენებთ, რომ ბრალდებული იმ 16 პირს შორის არის, რომელიც სამართალდამცავებმა თბილისში, მელიქიშვილის გამზირზე მიმდინარე აქციის დროს ადმინისტრაციული წესით დააკავეს.

დევიძეს სხვა დაკავებულებთან ერთად პოლიციელის დაუმორჩილებლობასა და წვრილმანი ხულიგნობის ჩადენას ედავებოდნენ, თუმცა 48-საათიანი ადმინისტრაციული პატიმრობის ვადის ამოწურვის შემდეგ, როცა იზოლატორიდან უნდა გამოეშვათ, მუხლი შეუცვალეს და ამ ეტაპზე, გამოძიება სისხლის სამართლის შესაძლო დანაშაულის ჩადენისთვის მიმდინარეობს. პროკურატურის თქმით დევიძემ "სამ პოლიციელს ხის ჯოხით სხვადასხვა სახის დაზიანებები მიაყენა".

მათე დევიძეს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს.