შინაგან საქმეთა სამინისტროს თანამშრომლებმა დღეს, 19 აპრილს საქართველოში კრიმინალური სამყაროს წევრობის ბრალდებით 3 პირი დააკავა. ამის შესახებ ინფორმაცია შსს-ში ბრიფინგზე ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსმა, მამუკა ჭელიძემ განაცხადა.

მისი თქმით, სპეცოპერაცია ევროპოლთან შეთანხმებით ჩატარდა.

დაკავებულები არიან:

  • თბილისში, მახათას აღმართის მიმდებარე ტერიტორიაზე 1989 წელს დაბადებული დიმიტრი ჭრელაშვილი;
  • სიღნაღის რაიონის სოფელ ძველ ანაგაში 1973 წელს დაბადებული გივი ბეგიაშვილი;
  • თბილისში, მუხიანი მე-3 მიკრორაიონში 1993 წელს დაბადებული კახა ბეჟიტაშვილი.

"ბრალდებულები აღიარებენ ე.წ. ქურდულ სამყაროს. ისინი მონაწილეობას იღებდნენ "ქურდულ გარჩევებში" და აქტიური კავშირი ჰქონდათ ევროპაში მყოფ ქართველ კანონიერ ქურდებთან - მალხაზ ზედელაშვილთან, კახა შავლიაშვილთან, აბესალომ პაპიაშვილთან და გიორგი ხატიაშვილთან", - აცხადებენ შსს-ში.

მათივე განმარტებით, გამოძიებამ დაადგინა, რომ ჯგუფის სამივე წევრმა ერთ-ერთ მოქალაქეს ქურდული გარჩევა მოუწყო, ოჯახის წევრებისა და ქონების განადგურების მუქარით 60 000 ლარის გადახდა მოსთხოვეს.

საქმეზე გამოძიება საქართველოს სისხლის სამართლის კოდექსის 223 მუხლით (ქურდული სამყაროს წევრობა) მიმდინარეობს.