არაძალადობრივი გზით, პირთა პროსტიტუციაში ჩაბმა კრიმინალიზებული ხდება. ცვლილების შესაბამის კანონპროექტს პარლამენტის იურიდიულ საკითხთა კომიტეტის სხდომაზე დღეს პირველი მოსმენით განიხილავენ.

კანონპროექტით შემოთავაზებულია, რომ საქართველოს სისხლის სამართლის კოდექსის 254-ე მუხლს დაერქვას "პროსტიტუციის ხელშეწყობა" და მის პირველ ნაწილში დანაშაულად გამოცხადდეს "პირის დაყოლიება პროსტიტუციაზე ან/და სხვა ისეთი არაძალადობრივი ქმედების განხორციელება, რომელიც ხელს უწყობს პირის მონაწილეობას პროსტიტუციაში".

ცვლილების ინიციატორი საქართველოს იუსტიციის სამინისტროა.

"სამართალდამცავ უწყებებს არ აქვთ სამართლებრივი საფუძველი, იმოქმედონ იმ პირების წინააღმდეგ, რომლებიც არაძალადობრივი მეთოდებით ხელს უწყობენ პირის ჩაბმას პროსტიტუციაში, მათ შორის, იმ ბარების, კლუბების თუ სხვა დაწესებულებების წინააღმდეგ, სადაც არაძალადობრივი მეთოდებით ადამიანებს, ზოგიერთ შემთხვევაში კი არასრულწლოვანებს პროსტიტუციაში ჩართვის მიზნით, ხელს უწყობენ", - განმარტავენ კანონპროექტის ავტორები.

განმარტებითი ბარათის მიხედვით, ასეთი პირების მიმართ საგამოძიებო მოქმედებები ვერ იწყება ვერც საქართველოს სისხლის სამართლის კოდექსის 253-ე მუხლით, რომელიც ითვალისწინებს პროსტიტუციაში ჩაბმას ძალადობით, ძალადობის ან ქონების განადგურების მუქარით, შანტაჟით ან მოტყუებით და ვერც 254-ე მუხლით, რომელიც დანაშაულად აცხადებს მხოლოდ პროსტიტუციისათვის ადგილის გადაცემას.

"შესაძლოა, ასეთი ადგილები არც გამოიყენებოდეს პროსტიტუციის ადგილად, მაგრამ გამოყენებოდეს იმისათვის, რათა პროსტიტუციაში ჩაბმული პირი და მისი "მომსახურებით" მოსარგებლე შეხვდნენ ერთმანეთს და შეთანხმდნენ ამგვარ მომსახურებაზე", - აცხადებენ ცვლილების ინიციატორები.

კანონპროექტის განმარტებით ბარათში ვკითხულობთ, რომ ცვლილების მიზანია ქვეყნის წინაშე არსებული გამოწვევის დაძლევა, არასრულწლოვნების პროსტიტუციაში ჩაბმისგან დაცვა და პროსტიტუციისათვის ხელშეწყობის პრევენცია, აგრეთვე შესაბამის დანაშაულთა ზუსტი კვალიფიკაცია.