მეოცე საუკუნის დასაწყისში ტიტანიკი ყველაზე დიდი სამგზავრო გემი იყო. რეკორდულ ზომებთან ერთად კი, ის ასევე პირველი გრანდიოზული მასშტაბების ლაინერი იყო, რომელიც აისბერგს დაეჯახა და ჩაიძირა.

ყინულივით ცივ წყალში გემმა ფსკერისაკენ დაიწყო დაშვება და 1500 მგზავრი იმსხვერპლა. ამ მოვლენიდან საუკუნეზე მეტი გავიდა, თუმცა ტიტანიკის ტრაგედია დღემდე განხილვის საგანია.

ტრაგედიის ღამის შემდეგ დატრიალებული მოვლენების შესახებ ასე თუ ისე ყველამ ვიცით, თუმცა, ტიტანიკის ჩაძირვას წინ უცნაური ამბები უძღვოდა, რაც ლაინერის ბურუსით მოცულ დასასრულს კიდევ უფრო საინტერესოს ხდის.

საქმე ის არის, რომ ტიტანიკი 1912 წლის 15 აპრილს ჩაიძირა, 1886 და 1898 წლებში კი ორი ბრიტანელი ავტორის წიგნი გამოიცა. ისინი ტიტანიკის ჩაძირვას წინასწარმეტყველებდნენ.

გამომძიებელი ჟურნალისტის წიგნი, რომელიც 1886 წლით თარიღდება, მოგვითხრობს ისტორიას გემის შესახებ, რომლის ბედიც ტიტანიკისას მოგაგონებთ.

How the Mail Steamer Went Down in Mid Atlantic, by a Survivor - ასე ჰქვია უილიამ თომას სტიდის ისტორიას, რომელიც ლაინერ ატლანტიკის ოკეანეში მოგზაურობას აღწერს. წიგნის მთავარი პერსონაჟი ტომპსონია, რომელიც სიკვდილს მხოლოდ მას შემდეგ გადაურჩება, რაც სავსე ნავები ტრაგედიის ადგილზე ცოცხლად დარჩენილების წასაყვანად დაბრუნდებიან.

ისევე როგორც ტიტანიკი, ატლანტიკიც კატასტროფას განიცდის და ზუსტად იმეორებს 1912 წელს დატრიალებული ტრაგედიის დეტალებს. მაგალითად იმას, რომ მგზავრებისთვის სამაშველო ნავები არ ეყოთ.

აღსანიშნავი ფაქტია ის, რომ 1912 წელს სტედმა ამერიკაში გამგზავრება სწორედ ტიტანიკით გადაწყვიტა, საბოლოოდ კი მსხვერპლთა შორის აღმოჩნდა.

მეორე რომანი, რომელიც ტიტანიკის ჩაძირვას წინასწარმეტყველებდა, მორგან რობერტსონის The Wreck of the Titan: Or, Futility-ია. მასში აღწერილია ატლანტის ოკეანეში აისბერგთან შეჯახების შედეგად ჩაძირული დიდი გემის ისტორია. ბედის ირონიით, ამ გემს "ტიტანი" ერქვა, რაც აშკარად ჰგავს "ტიტანიკს".

აღნიშნული სტატიით, რობერტსონი გემთმშენებლების გა­ფრთხილებას ცდილობდა და სთხოვდა, გემზე უსაფრთხოებისთვის აუცილებელი ზომები მიეღოთ. ავტორი ყველა იმ დეტალს აღწერს, რამაც ასეთი დიდი კატასტროფა გამოიწვია. მაგალითად, სტატიაში ის ხაზს უსვამს, რომ გემს აუცილებლად უნდა ჰქონდეს საკმარისი რაოდენობის სამაშველო ნავები.

კატასტროფის შემდეგ სერიოზულად დაიწყო ტიტანიკის ჩაძირვასთან დაკავშირებული საკითხების შესწავლა. ამ ფაქტს გამოეხმაურა რობერტსონიც, რომელმაც თქვა "ვიცოდი, რასაც ვწერდი, მხოლოდ ამის თქმა შემიძლია".