ნეონაცისტური ჯგუფის, ქართული მარშის განცხადებით, მათი წევრები, რომლებიც ხულიგნობის ბრალდებით წინასწარი პატიმრობით გლდანის ციხეში არიან 30 აპრილს მშრალ შიმშილობას იწყებენ.

როგორც სანდრო ბრეგაძემ On.ge-ს უთხრა, შიმშილობის გადაწყვეტილება თვითონ დაკავებულებმა მიიღეს და, სავარაუდოდ, მათ სხვა პატიმრებიც შეუერთდებიან. მისივე თქმით, შიმშილობის აქციას ციხის გარეთ ათეულობით ადამიანი შეუერთდება.

ბრეგაძის განმარტებით, შიმშილობას მანამ გააგრძელებენ, სანამ მათ მოთხოვნებს არ დააკმაყოფილებენ, კერძოდ, დაპატიმრებულებს არ გაათავისუფლებენ.

სანდრო ბრეგაძე მიიჩნევს, რომ დაკავებულები უდანაშაულოები არიან და მათ მაქსიმუმ ადმინისტრაციული სასჯელი ეკუთხვნით.

19 მარტს ქართული მარშის წევრებმა რუსთავი 2-თან აქცია გამართეს. მათ მიაჩნდათ, რომ ტელეწამყვანმა გიორგი გაბუნიამ მორწმუნეთა "რელიგიურ გრძნობებს" შეურაცხყოფა მიაყენა, როცა 18 მარტს გადაცემა P.S.-ში იესო ქრისტეს ჯვარცმაზე ისაუბრა.

აქციაზე ქართული მარშის წევრებმა, რუსთავი 2-ის ჟურნალისტს დავით ერაძეს სცემეს. მათ გიორგი გაბუნიას მანქანას ალყა შემოარტყეს და სიტყვიერი შეურაცხყოფა მიაყენეს. პოლიციამ ქართული მარშის ექვსი წევრი დააკავა, მოგვიანებით კი კიდევ ერთი წევრი დააკავეს.