შინაგან საქმეთა მინისტრის მოადგილის, ნათია მეზვრიშვილის განცხადებით, შიშები იმასთან დაკავშირებით, რომ სკოლაში პოლიცია შედის საფუძველს მოკლებულია. მინისტრის მოადგილის თქმით, ბალანსი საპოლიციო ფუნქციებსა და მანდატურის უფლებამოსილებას შორის დაცულია და ზღვარი მკაფიოა.

მეზვრიშვილის განცხადებით, მანდატურის ყველა ქმედებაში მონაწილეობას მიიღებს სკოლის წარმომადგენელი და ინფორმირებული იქნება მშობელი. მეზვრიშვილი ამბობს, რომ მოსწავლეების მეტალოდეტექტორით დათვალიერება უკონტაქტო და ზედაპირული იქნება. მისვე თქმით, სადაც შესაძლებელი იქნება შემოწმებას იმავე სქესის მანდატურები ჩაატარებენ, პროცესში კი დაცული იქნება მოზარდთა უფლებები.

მეზვრიშვილმა მანდატურის უფლებამოსილების გაზრდაზეც ისაუბრა:

"მანდატური შეიძენს მნიშვნელოვან უფლებამოსილებებს, მათ შორის მოსწავლეების განცალკევების უფლებას, რაც გულისხმობს იმას, რომ თუ მოზარდებს შორის კონფლიქტური სიტუაციაა, მათ შეეძლებათ კონფლიქტის დეესკალაციის მიზნით მოსწავლეები ერთმანეთისგან განაცალკეონ, მათთვის ფიზიკურად და ფსიქოლოგიურად შესაბამის გარემოში".

მინისტრის მოადგილის თქმით, განცალკევების პროცესში, საჭიროების შემთხვევაში, ჩაერთვებიან ფსიქოლოგები, სოციალური მუშაკები და სკოლის წარმომადგენლები.

ზოგადი განათლების შესახებ კანონის ცვლილებების პროექტი, განათლებისა და შინაგან საქმეთა სამინისტროებმა ერთობლივად შეიმუშავეს. ის უახლოეს მომავალში განსახილველად პარლამენტს გადაეგზავნება.

მანდატურის სისტემის რეფორმა მას შემდეგ დაიგეგმა, რაც პირველ დეკემბერს, თბილისში, ხორავას ქუჩაზე არასრულწლოვნებს შორის ურთიერთშელაპარაკების შედეგად ორი მოზარდი მოკლეს.

გაიგეთ მეტი: