დიდი ბრიტანეთისა და აშშ-ს გადაწყვეტილებას რუსი დიპლომატების გაძევების შესახებ, ევროკავშირის 8 სახელმწიფო უერთდება. ევროპული საბჭოს პრეზიდენტის დონალ ტუსკის განცხადებით, მსგავსს ზომებს ევროკავშირის 14 სახელმწიფო მიიღებს, თუმცა ჯერჯერობით ევროკავშირის მხოლოდ 8 სახელმწიფოს გადაწყვეტილების შესახებ ვრცელდება ინფორმაცია.

დღეს, 26 მარტს ცნობილი გახდა, რომ საფრანგეთი, გერმანია და პოლონეთი თითოეული ქვეყნა ოთხ-ოთხ რუს დიპლომატს გაააძევებს.

ასევე, რუსეთიდან თავისი ელჩის გაწვევის შესახებ გადაწყვეტილება მიიღო ევროკავშირმაც. ამ დროისთვის ჯამურად აშშ-სა და ევროპაში თავის სამუშაო ადგილს 119 რუსი დიპლომატი დაკარგავს, თუმცა სია სავარაუდოდ გაიზრდება.

დიპლომატების გაძევების მიზეზი, დიდ ბრიტანეთში 4 მარტს ყოფილი რუსი ჯაშუშისა და მისი შვილის მოწამვლის საქმე გახდა. წინა კვირას გამართულ შეხვედრაზე, დიდი ბრიტანეთის პრემიერის - ტერეზა მეის, საფრანგეთის პრეზიდენტის - ემანუელ მაკრონისა და გერმანის კანცლერის - ანგელა მერკელის ერთობლივ განცხადებაში აღნიშნეს, რომ მოწამვლის უკან, დიდი ალბათობით, რუსეთი იდგა.

დიპლომატების გაძევების პირველი ტალღა დიდი ბრიტანეთიდან წამოვიდა. ამ წუთისთვის სია შემდეგნაირად გამოიყურება:

  1. აშშ - 60;
  2. დიდი ბრიტანეთი - 23;
  3. უკრაინა - 13;
  4. საფრანგეთი - 4;
  5. გერმანია - 4;
  6. პოლონეთი - 4;
  7. ჩეხეთი - 3;
  8. ლიტვა - 3;
  9. დანია - 2;
  10. ლატვია - 1;
  11. ესტონეთი - 1.