უკრაინის ახალგაზრდობისა და სპორტის მინისტრმა, იგორ ჟდანოვმა ხელი მოაწერა ბრძანებას, რომლის თანახმადაც ქვეყნის ეროვნულ ნაკრებებს რუსეთის ტერიტორიაზე სპორტულ ღონისძიებებში მონაწილეობა ეკრძალებათ.

ამასთანავე, მინისტრმა საერთაშორისო ფედერაციებს მოუწოდა, რომ აღარ დანიშნონ შეჯიბრებები რუსეთში, სადაც "სპორტის სფეროს საერთაშორისო კანონმდებლობას უგულებელყოფენ".

მანამდე ცნობილი გახდა, რომ აშშ-ის, კანადისა და ჩეხეთის მსგავსად, უკრაინამ ბოიკოტი გამოუცხადა ბიატლონის მსოფლიო თასის ფინალურ ეტაპს, რომელც ტიუმენში 19-26 მარტს გაიმართება.

2016 წელს სპორტის მინისტრის გადაწყვეტილებით, უკრაინამ რუსეთის ტერიტორიაზე ჩატარებულ ნებისმიერ კომერციულ და კერძო ტურნირში მონაწილეობაზე უარი განაცხადა.