პრემიერმინისტრის, გიორგი კვირიკაშვილის თქმით, ნატოს ვარშავის სამიტის შემდეგ ჩვენი ქვეყანა ევროატლანტიკურ სივრცეს კიდევ უფრო დაუახლოვდება, საქართველოს არსებითი პაკეტი ნატოსთან კი გაფართოვდება, რის შედეგადაც ქვეყნის უსაფრთხოება კიდევ გაძლიერდება:

"ამ სამიტზე საქართველო ელოდება კიდევ ერთხელ დადასტურებას, რომ 2008 წლის ბუქარესტის სამიტის გადაწყვეტილება ძალაში რჩება და საქართველო აუცილებლად გახდება ნატოს წევრი. და რა თქმა უნდა, ასევე დადასტურებას იმ პროგრესის, რომელსაც საქართველომ ამ კუთხით მიაღწია როგორც სამხედრო რეფორმით, ნატოსთან ჩვენი სამხედრო შენაერთების თავსებადობის კუთხით, ასევე დემოკრატიის განვითარების კუთხით ქვეყანაში, რაც ვფიქრობთ, რომ ძალიან მნიშვნელოვანია".

ნატოს სამიტი ვარშავაში ხვალ დაიწყება და 2 დღის განმავლობაში გაგრძელდება. პოლონეთის დედაქალაქში, სადაც უსაფრთხოების ზომები მაქსიმალურად არის გამკაცრებული, უკვე ჩავიდა საქართველოს თავდაცვის მინისტრი, თინა ხიდაშელი.

ხიდაშელის განმარტებით, სამიტზე შავი ზღვის უსაფრთხოებისა და ქვეყნის საჰაერო თავდაცვისუნარიანობის საკითხებს განიხილავენ. მისი თქმით, საქართველო ვარშავიდან წამოიღებს ინსტრუმენტს, რომელიც საქართველოს უფრო დაცულ ქვეყნად აქცევს:

"ჩვენი მთავარი ამოცანა ამ 2 დღის განმავლობაში მდგომარეობს იმაში, რომ რაც შეიძლება უფრო მეტად დავუახლოვოთ ჩვენი ქვეყანა ევროატლანტიკურ სივრცეს. მაგრამ ყველაზე მნიშვნელოვანი ალბათ ის არის, რომ ვარშავიდან უფრო მეტი თავდაცვისუნარიანობის საშუალებებით ჩამოვიდეს საქართველო, უფრო მეტად დაცული და უფრო მეტი შესაძლებლობით".

ნატოს სამიტის ოფიციალურ გახსნამდე, დღეს, ნატოს გენერალური მდივანი პოლონეთის პრეზიდენტთან ერთად მედიისთვის პრესკონფერენციასაც გამართვას.