"ჟურნალისტური ეთიკის ქარტია არის ერთი ჩვეულებრივი არასამთავრობო ორგანიზაცია (ასო) რომელსაც ყავს 311 წევრი-ხელმომწერი," - ამ შინაარსის პოსტს აქვეყნებს საზოგადოებრივი მაუწყებლის სამეურვეო საბჭოს ერთ-ერთი წევრი, გიორგი იაკობაშვილი ფეისბუკზე. On.ge იაკობაშვილის უხამს გამონათქვამს მაღალი საჯარო ინტერესიდან გამომდინარე გთავაზობთ.

მისი თქმით, ქარტიას, რომელიც რამდენიმე ასეულ ჟურნალისტს აერთიანებს "სერიოზულ" ჟურნალისტებში წონა და ავტორიტეტი არ აქვს. მისი თქმით, ქარტიის ხელმომწერების უმრავლესობა რეგიონის ჟურნალისტია და მათთვის გრანტს მისაღებად ამ ორგანიზაციაში გაერთიანება აუცილებელია.

"საერთოდ, ბოლომდე დაიკიდეთ ეს მესამე სექტორად წოდებული მეხუთე კოლონა. თქვენი ქოთქოთი მათ სივებში იწერება, აქტივობაში ეთვლებათ, რის გარეშეც ევროპაში დაფუძნებული და რუსეთიდან დაფინანსებული ფონდებიდან მსუყე გრანტებს კი არა, სამში თამამს მიიღებენ", - წერს იაკობაშვილი.

84 ხმით 2-ის წინააღმდეგ საქართველოს პარლამენტმა გიორგი იაკობაშვილი საზოგადოებრივი მაუწყებლის სამეურვეო საბჭოს წევრად 2017 წლის 30 ივნისს აირჩია. ის პარალელურად იყო For.ge-ს მთავარი რედაქტორი.

საქართველოს ჟურნალისტური ეთიკის ქარტია ჟურნალისტთა დამოუკიდებელი გაერთიანებაა. ორგანიზაციის მისიაა პროფესიული და ეთიკური სტანდარტის დაცვისა და თვითრეგულირების მექანიზმების შექმნის გზით, მედიის საზოგადოებრივი პასუხისმგებლობის ამაღლება.

ორგანიზაცია 2009 წლის 4 დეკემბერს დაფუძნდა. სხვდასხვა მედიასაშუალების 137-მა ჟურნალისტმა როგორც რეგიონიდან ისე დედაქალაქიდან ხელი მოაწერა 11 პრინციპს და მისი დაცვის ვალდებულება აიღო. მოქალაქეებს კი მიეცათ საშუალება, ჟურნალისტურ მასალაში ეთიკური დარღვევის შემთხვევაში განცხადებით მიემართა ქარტიისთვის. დღევანდელი მდგომარეობით ქარტიას 318 ხელმომწერი ჰყავს.