თბილისის საქალაქო სასამართლომ თბილისის მეტროში ხულიგნობისა და წინააღმდეგობის გაწევისთვის დაკავებული ორი პირი კანონდამრღვევად სცნო.

სასამართლომ დაადგინა, რომ მათ დაარღვიეს საზოგადოებრივი წესრიგი, კერძოდ, საზოგადოებრივი თავშეყრის ადგილას იგინებოდნენ, არ დაემორჩილნენ პოლიციის თანამშრომელთა კანონიერ მოთხოვნას და შეურაცხყოფა მიაყენეს პოლიციელებს, რის გამოც სასჯელის სახით 1 000 და 500 -ლარიანი ჯარიმა დაეკისრათ. გიორგი სილაგაძე და თეიმურაზ მენაბრიშვილი პოლიციამ 28 იანვარს მეტროსადგურ თავისუფლების მოედანზე დააკავა.

ბრალდების მტკიცებულებები

სასამართლოზე ბრალდების მხარემ, მტკიცებულების სახით, წარადგინა მეტროში დამონტაჟებული და პოლიციელების სამხრე კამერის ვიდეო ჩანაწერები. როგორც On.ge-ს ჟურნალისტი სასამართლო დარბაზიდან იტყობინებოდა, ჩანაწერებიდან ერთი ინციდენტს სრულად ასახავს, დანარჩენები კი ფრაგმენტულია.

ვიდეოში ჩანს, როგორ მივიდა პოლიციელი გიორგი სალაგაძესთან და სამართალდამცავის შეურაცხყოფისთვის დააკავა, თუმცა იმავე ბრალდებით მოგვიანებით დააკავეს მისი თანმხლები პირი თეიმურაზ მენაბრიშვილი. ბრალდების მხარემ წარადგინა ალკოტესტის მონაცემებიც, რომლის მიხედვითაც, დაკავებული გიორგი სალაგაძე ალკოჰოლური თრობის ქვეშ იყო.

დაცვის მხარის პოზიცია

ადვოკატის თქმით, სალაგაძეს ალკოტესტის ჩვენება გასულ დღეს მიღებული ალკოჰოლის გამო დაუდგინდა. მენაბრიშვილის ადვოკატმა აღნიშნა, რომ მისი დაცვის ქვეშ მყოფი ადვოკატთან დაკავშირების დროს "იმის გამო დააკავეს, რომ მეგობარს ბოლომდე მიჰყვა".

გარდა ამისა, ადვოკატმა მოითხოვა განმარტება თავიდანვე რატომ არ დააკავეს მენაბრიშვილი, რომელიც დაკავებულ მეგობარს მისდევდა, რაზეც საქმეში მონაწილე პოლიციელმა განმარტა "იქ ცუდი ვითარება იყო შექმნილი და მისი დაკავება მშვიდ ვითარებაში გადავწყვიტეთ".

სალაგაძის ადვოკატმა ვიდეო ჩანაწერების სრული ვერსიის მისაღებად სასამართლოს შუამდგომლობით მიმართა. მისი განცხადებით, ჩანაწერები დაჭრილია და ფაქტი სრულად არ ჩანს. მოსამართლემ მტკიცებულებების ნაკლებობის გამო, ადვოკატების შუამდგომლობა კადრების მიღების და სხდომის გადადების შესახებ არ დააკმაყოფილა. ადვოკატები სასამართლო გადაწყვეტილების გასაჩივრებას გეგმავენ.

დაკავების დეტალები

მოქალაქეების დაკავების კადრები სოციალური ქსელით გავრცელდა. ვიდეოში ისმოდა, რომ დაკავებულიც და ირგვლივ მყოფი მოქალაქეებიც პოლიციელისგან დაკავების მიზეზების განმარტებას ითხოვდნენ.

ინციდენტის მეორე დღეს, 29 იანვარს, შს მინისტრის მოადგილემ, ნათია მეზრიშვილმა ამ საკითხთან დაკავშირებით პრესკონფერენცია გამართა. მეზვრიშვლის თქმით, დაკავების მხოლოდ ნაწილია ასახული მოქალაქის მიერ სოციალურ ქსელში გავრცელებულ ვიდეოში და ინციდენტის ამსახველ სრულად ვიდეოს სასამართლოში წარადგენდნენ.

საქმეზე გამოძიება ადმინისტრაციულ სამართალდარღვევათა კოდექსის 166-ე და 173-ე მუხლებით მიმდინარეობდა, რაც წვრილმან ხულიგნობას და სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას გულისხმობს. 166-ე მუხლი ითვალისწინებს 100 ლარის ოდენობით სანქციას. თუ ამ ზომის გამოყენება არასაკმარისად იქნება მიჩნეული გათვალისწინებულია ადმინისტრაციულ პატიმრობა 15 დღემდე ვადით. 173-ე მუხლით კი გათვალისწინებულია 250 ლარიდან 2000 ლარამდე ჯარიმა ან ადმინისტრაციულ პატიმრობა 15 დღემდე ვადით.