თბილისში ეუთოს საპარლამენტო ასამბლეის პლენარული სესია მიმდინარეობს. შეხვედრაში ეუთოსა და ევროპის საბჭოს საპარლამენტო ასამბლეის პრეზიდენტები და გერმანიის საგარეო საქმეთა მინისტრი მონაწილეობენ.

ასამბლეა პარლამენტის თავმჯდომარემ დავით უსუფაშვილმა გახსნა. სიტყვით გამოსვლისას, მან განაცხადა, რომ ეუთომ არათუ ვერ შეძლო 2008 წელს რუსეთის აგრესიის პრევენცია, არამედ, თავადაც განდევნეს იგი საქართველოს ტერიტორიიდან:

"სამხრეთ ოსეთიდან ქართველების ეთნიკურ წმენდას, თბილისიდან ეუთო-ს მისიის წმენდაც მოჰყვა, ეს დასაფიქრებელი შემთხვევაა იმისთვის, რომ ვიფიქროთ, ორგანიზაციის მისიის შესასრულებად აუცილებელ ტრანსფორმაციაზე".

"საქართველომ მტკიცედ განაცხადა და რომ ჩვენ არცერთ შემთხვევაში იმ სირთულეების მოგვარებას, რომელიც ქვეყნის წინაშე არსებობს არ შევეცდებით სამხედრო გზით" - ამის შესახებ პრეზიდენტმა გიორგი მარგველაშვილმა განაცხადა ეუთოს ასამბლეაზე სიტყვით გამოსვლისას და მოუწოდა ყველა მხარეს, რომ მტკიცედ ჩაერთოს სიტუაციის დარეგულირების პროცესში.

მისივე თქმით, საქართველო არის ეუთოს პროცესის აქტიური მონაწილე და რომ ნებისმიერი ტიპის პრობლემები, ნებისმიერი ტიპის დაძაბულობა, შესაძლებელია მოიხსნას ინტენსიური დიალოგითა და მსჯელობით იმ ღირებულებზე და იმ საჭიროებებზე, რომლებიც გააჩნიათ დაპირისპირებულ მხარეებს.

ეუთოს საპარლამენტო ასამბლეის ერთ-ერთი მთავარი თემაა საქართველოსა და ეუთოს 25 წლიანი თანამშრომლობა. დამსწრეები ასევე, განიხილავენ უკრაინის საკითხს, უნდა განთავსდეს თუ არა მშვიდობისმყოფელები უკრაინაში იმისათვის რომ მინსკის ხელშეკრულება შესრულდეს. ასევე ის თუ რა ვითარებაა მთიან ყარაბაღში და ის, თუ როგორი უნდა იყოს შრომითი ბაზარი მიგრანტებისათვის.

ღონისძიებაში 57 ქვეყნის 700-მდე წარმომადგენელი იღებს მონაწილეობას. 5 დღიანი სესიის დასრულების შემდეგ ეუთო თბილისის დეკლარაციას მიიღებს, რომელსაც ეუთოს ყველა ქვეყნის წარმომადგენელმა უნდა მოაწეროს ხელი.