NASA-ს კოსმოსური ხომალდი Juno, რომლის მისიაც იუპიტერის გამოკვლევაა, პლანეტის მაგნიტოსფეროში შევიდა.

Juno 2011 წლის 5 აგვისტოს გაეშვა და იუპიტერის ორბიტაზე 4 ივლისს დაჯდება. ხომალდი პლანეტის ორბიტაზე 20 თვის განმავლობაში დარჩება. ამ ხნის განმავლობაში მისია იმუშავებს შემდეგ საკითხებზე:

  • რა რაოდენობის წყალია იუპიტერის ატმოსფეროში - რითაც გაირკვევა ამ პლანეტის ფორმაციის სპეციფიკა.
  • გაზომავს ატმოსფეროს კომპოზიციას, ტემპერატურას, ღრუბლების მოძრაობას და სხვა მონაცემებს.
  • შეისწავლის იუპიტერის მაგნიტურ და გრავიტაციულ ველებს, რის შედეგადაც გამოვლინდება პლანეტის სტრუქტურა.
  • შეისწავლის პლანეტის მაგნიტოსფეროსა და მის გავლენას ატმოსფეროზე.

იუპიტერის მაგნიტოსფერო მზის სისტემაში ყველაზე დიდი სტრუქტურაა.

"იუპიტერის მაგნიტოსფერო რომ ანათებდეს, ცაზე სავსე მთვარეზე ორჯერ დიდად გამოჩნდებოდა." ამბობს ვილიამ კარტი, აიოვას უნივერსიტეტის პროფესორი, რომელიც მისიის კვლევითი ჯგუფის ერთ-ერთი ხელმძღვანელია.

ფოტო: NASA

ეს ფოტო Juno-მ 28 ივნისს გადაიღო, იუპიტერიდან 6.2 მილიონი კილომეტრში. ფოტოზე ჩანს იუპიტერი და მისი 67 ბუნებრივი თანამგზავრიდან სამი: განიმედე, იო და ევროპა.