მშობლები შვილების განათლებაში ფულს ხარჯავენ და ხშირად იმედოვნებენ, რომ ისინი სიბერეში მათზე იზრუნებენ. თითქოს ეს დაუწერელი კანონია, რომელზეც არ საუბრობენ, თუმცა ტაივანელმა ქალმა მომავალი გართულებებისგან თავის ასარიდებლად, თავის შვილთან კონტრაქტი დადო.

კონტრაქტის მიხედვით, ქმარს გაშორებული მარტოხელა დედა თავის შვილს სტომატოლოგიის სკოლაში სწავლის საფასურს გადაუხდიდა, სამაგიეროდ კი, ის სიბერეში უნდა დახმარებოდა და საკუთარი შემოსავლის დიდი ნაწილი მისთვის უნდა გადაეხადა.

მოსარჩელის თქმით, მან თავისი ორი შვილის სწავლის დასაფინანსებლად, მარტომ მოიძია ასობით ათასი დოლარი. ის შიშობდა, რომ სიბერეში დახმარებას ვერ მიიღებდა, ამიტომ თავის 20 წლის შვილს კონტრაქტზე ხელი მოაწერინა.

კონტრაქტს ზურგს უმაგრებს ტაივანის კანონმდებლობა, რომლის მიხედვითაც მოზრდილებს დედ-მამის მიტოვების უფლება არ აქვთ, თუმცა მარტო და დახმარების გარეშე დარჩენილი მშობლების უმრავლესობა შვილებს არ უჩივის. ეს სიტუაცია კი იშვიათი იყო, რადგან სასამართლო დედისა და შვილის შორის დადებულ წერილობით კონტრაქტს განიხილავდა.

კონტრაქტის მიხედვით, ექიმად მუშაობის დაწყების შემდეგ, შვილს დედისთვის შემოსავლის 60% უნდა გადაეხადა, რაც დაახლოებით 1,7 მილიონ ამერიკულ დოლარს უდრის.

მისი შვილი ლიცენზირებული სტომატოლოგი 14 წლის წინ გახდა, დედამ კი სარჩელი სასამართლოში 8 წლის წინ შეიტანა.

ტაივანის უზენაესმა სასამართლომ დედის მხარე დაიჭირა და განაცხადა, რომ კონტრაქტი ვალიდური იყო, რადგან მოსარჩელის შვილი სრულწლოვანი იყო, როცა მასზე ხელი მოაწერა და ექიმ შვილს დედისთვის 710 ათასი ევროს გადახდა დააკისრა, რაც თითქმის ერთი მილიონი ამერიკული დოლარია.