ოცნების პრემიერი ირაკლი კობახიძე ალბანეთში დაგეგმილ ევროპული საზოგადოების სამიტზე ჩავიდა. კობახიძე მონაწილეობას მიიღებს თემატურ დისკუსიაში, რომელიც ევროპულ უსაფრთხოებას შეეხება.

ევროპული გაერთიანების რიგით მეექვსე შეხვედრა ასეა დასათაურებული: "ახალი ევროპა ახალ მსოფლიოში, ერთობა – თანამშრომლობა – ერთობლივი მოქმედება".

როგორც ირაკლი კობახიძემ "იმედის" ეთერში განაცხადა, სამიტი ერთდღიანია.

"ფორმატს რაც შეეხება, არის ერთდღიანი საკმაოდ დატვირთული. ერთადერთი სადაც შეიძლება იქ შეხვედრები გაიმართოს, არის დერეფნები, ასეც ხდება ხოლმე. დერეფნებში, როგორც წესი, ხვდებიან ერთმანეთს ლიდერები და ამას ყოველთვის ვაკეთებთ ჩვენც. როგორც წესი, გამორიცხულია, ასეთი სესიის დროს არ მოგეცეს სულ მცირე 6-7 ლიდერთან გასაუბრების საშუალება. ჩვენ არც მოგვითხოვია შეხვედრები, მაგრამ ადგილზე ვეცდებით, ყველას გავესაუბროთ", — განაცხადა ირაკლი კობახიძემ.

კითხვაზე, ლიდერებთან შეხვედრისას რა იქნება მთავარი გზავნილები, კობახიძემ აღნიშნა, რომ მის მიერ გავრცელებულ ღია წერილში გახმოვანებულია სწორედ ის გზავნილები, რაც საქართველოს აქვს.

"პრეზიდენტს ტრამპის მიმართ და ვიცე-პრეზიდენტის მიმართ გავრცელებულ ღია წერილში ჩვენ რაც გავახმოვანეთ, ეს არის ძირითადად ჩვენი გზავნილები. ჩვენ ვითხოვთ ერთადერთ რამეს, ეს არის სამართლიანობა ქართველი ხალხის და ჩვენი ქვეყნის მიმართ. ძალიან ბევრი ბრძოლა გვაქვს, 4 ომი გვაქვს გამოვლილი დამოუკიდებლობის აღდგენის შემდეგ, გვაქვს გამოვლილი ასევე არაერთი საერთაშორისო მისია. ჩვენი 32 ჯარისკაცი დაიღუპა საერთაშორისო მისიებში, სადაც ერთ სულ მოსახლეზე ყველაზე მეტი ჯარისკაცი გვყავდა წარმოდგენილი, იგივე ავღანეთი რომ ავიღოთ, აბსოლუტურ მაჩვენებლებში მეოთხე ადგილზე ვიყავით ჩვენი მისიით. ამხელა წვლილი გვაქვს შეტანილი საერთაშორისო მშვიდობის უზრუნველყოფაში, ასეთი ნაბიჯები გვაქვს გადადგმული ჩვენი საერთაშორისო პარტნიორების მიმართ, სად არის დაფასება. არავითარი დაფასება. რაც შეეხება დემოკრატიას, ამხელა პროგრესი განიცადა ქვეყანამ ამ 12 წლის განმავლობაში, სად არის ამის დაფასება. არავითარი დაფასება, არავითარი გათვალისწინება. ერთადერთი გზავნილი რაც შეიძლება გვქონდეს, საკვანძო, ძირითადი გზავნილი, ჩვენ ხომ ზედმეტს არაფერს არ ვითხოვთ - ეს არის სამართლიანი დამოკიდებულება ჩვენი ხალხის და ჩვენი ქვეყნის მიმართ. ამაზე შეიძლება ყველასთან საუბარი", — განაცხადა ირაკლი კობახიძემ.

16 მაისს, ალბანეთის დედაქალაქში ევროპის პოლიტიკური ლიდერების მე-6 სამიტი გაიმართება, სადაც 44 ევროპული ქვეყნის სახელმწიფოებისა და მთავრობის მეთაურები შეიკრიბებიან.

ევროპის პოლიტიკური თანამეგობრობა 2022 წლის შემოდგომაზე პრაღაში შეიქმნა, საფრანგეთის პრეზიდენტის, ემანუელ მაკრონის ინიციატივით, რომლის მიზანია დიალოგის განვითარება მთელ ევროპაში, მათ შორის როგორც ევროკავშირის წევრ, ასევე ევროკავშირის არაწევრ ქვეყნებში, გეოპოლიტიკური არასტაბილურობის გამწვავების პერიოდში. იდეა დაიბადა, როგორც პასუხი რუსეთსა და უკრაინას შორის სრულმასშტაბიან კონფლიქტზე და ევროპული უსაფრთხოებისა და დემოკრატიული ღირებულებებისადმი უფრო ფართო საფრთხეზე.

Berliner telegraph წერს, რომ სამიტზე ლიდერები, სავარაუდოდ, 15 მაისს, შუადღისას შეიკრიბებიან, ოფიციალური დისკუსიები კი 16 მაისს ტირანაში გაიმართება.

ღონისძიებისთვის მოსამზადებლად, ალბანეთის მთავრობამ გასულ კვირას დაამტკიცა სამიტის ორგანიზებისთვის დამატებითი საბიუჯეტო სახსრები. ოთხშაბათს გამართულ კაბინეტის სხდომაზე ასევე გადაწყდა, რომ 15 და 16 მაისი გზების დაგეგმილი დაკეტვისა და უსაფრთხოების ზომების გამო ტირანაში, კამეზში, ვორასა და კრუიაში მუნიციპალური თანამშრომლებისთვის სახალხო უქმე დღედ გამოცხადდება.

უსაფრთხოებისა და დემოკრატიის საკითხებში, რომლებიც თანამედროვე ევროპული დღის წესრიგის ცენტრშია.