დარგობრივი ეკონომიკისა და ეკონომიკური პოლიტიკის კომიტეტმა მხარი მესამე მოსმენითაც არ დაუჭირა მაუწყებლობის შესახებ კანონში შესატან ცვლილებებს, რომელსაც საზოგადოებრივი მაუწყებელი ითხოვდა. კომიტეტმა კანონპროექტი დღეს, 19 დეკემბერს, განიხილა.

ამავე კომიტეტმა მეორე მოსმენითაც არ დაუჭირა კანონპროექტს მხარი, პირველი მოსმენით კი იმ პირობით მიიღო, რომ დასახელებული პრობლემური საკითხები გაირკვეოდა.

იმის მიუხედავად, რომ დარგობრივი ეკონომიკისა და ეკონომიკური პოლიტიკის კომიტეტმა კანონპროექტი მეორე მოსმენით არ მიიღო, საქართველოს პარლამენტმა მას კენჭი უყარა და 85 ხმით დაამტკიცა.

ინფორმაციის თავისუფლების განვითარების ინსტიტუტი, საქართველოს ჟურნალისტური ეთიკის ქარტია და საქართველოს რეგიონულ მაუწყებელთა ასოციაცია მიიჩნევენ, რომ შეთავაზებული საკანონმდებლო ცვლილებები მაუწყებლობის შესახებ, წინააღმდეგობაში მოდის დემოკრატიული და გამჭვირვალე მმართველობის პრინციპებთან.

მათი განცხადებით, კანონის პროექტი ზღუდავს საზოგადოებრივ მაუწყებელში დაცულ საჯარო ინფორმაციაზე წვდომას და აწესებს ინფორმაციის ხელმისაწვდომობის ბევრად დაბალ სტანდარტს. არასამთავრობოები მიიჩნევენ, რომ მაუწყებლის მიერ განხორციელებულ შესყიდვათა მხოლოდ ძალზე მცირე ნაწილი განხორციელდება სახელმწიფო შესყიდვების შესახებ საქართველო კანონის შესაბამისად.

არასამთავრობო ორგანიზაციების პოზიციას იზიარებენ კერძო ტელევიზიების უმრავლესობა. ისინი გუშინ, 18 დეკემბერს, საქართველოს პრეზიდენტს შეხვდნენ. კანონპროექტზე ვეტოს დადების უფლება სწორედ პრეზიდენტს აქვს.