დღეს, 26 ივნისს „ქართული ოცნების“ ახალგაზრდული ფრთის თავმჯდომარედ გიორგი ჩაკვეტაძე აირჩიეს.
ყრილობაზე ღია კენჭისყირის წესით ასევე აირჩიეს გამგეობის ათი წევრი. ამავდროულად დასახელდნენ თავმჯდომარის მოადგილეები.
გიორგი ჩაკვეტაძემ აღნიშნა, რომ მათი სამომავლო გეგმები იქნება ინოვაცია ქართულ რეალობაში და ისინი მთლიანად ორიენტირებული იქნებიან ახალგაზრდობაზე:

"საკმაოდ საპასუხისმგებლო საქმე ჩავიბარე იმ ახალგაზრდებთან ერთად, რომლებმაც მართლა სიცოცხლის ფასად თავისი შედეგისთვის იბრძოლეს, იმ იდეოლოგიისთვის რასაც ქართული ოცნების იდეოლოგია ჰქვია."

ახალგაზრდული ფრთის წევრებს პრემიერ მინისტრმა გიორგი კვირიკაშვილმა და ენერგეტიკის მინისტრმა კახი კალაძემ მიმართეს.

პრემიერმა აღნიშნა, რომ ქვეყანას სჭირდება ახალი ხედვები ინიციატივები და ახალგაზრდული ენერგია:

"თქვენი ასაკისთვის დამახასიათებელი თამამი გადაწყვეტილებები საჭირო და მნიშვნელოვანია ჩვენი ქვეყნის მომავლისათვის, ჩვენი ქვეყნის განვითარებისათვის".

კახი კალაძემ განაცხადა რომ პარტიის ახალგაზრდული ფრთა არის ის საიმედო რესურსი, რომელიც მომავალში პოლიტიკური სპექტრის ფორმირების ქვაკუთხედი გახდება:

"თქვენ ხართ მომავალი არამარტო ამ ქვეყნის, არამედ იმ პოლიტიკური თანამედროვე სტილის, რაც ჩვენი საერთო მონდომებით ამ ქვეყანაში გახდება სტანდარტი და ჩაანაცვლებს დამარგინალებულ ან წარსულში ჩარჩენილ პოლიტიკურ სეგმენტს".