შინაგან საქმეთა სამინისტრო ლანჩხუთში, სასულიერო პირთან მომხდარი ინციდენტის შესახებ განცხადებას ავრცელებს. უწყების ცნობით, მომხდარის ამსახველ ვიდეო ჩანაწერს ისინი საქართველოს საპატრიარქოს გაუგზავნიან, ამ ეტაპზე კი საჯაროდ არ გამოაქვეყნებენ.

განცხადებაში ნათქვამია, რომ 2016 წლის 26 ივნისს, დაახლოებით დილის 5 საათზე, ქალაქ ლანჩხუთში, ჟორდანიას ქუჩაზე, შსს-ს საპატრულო პოლიციის თანამშრომლებმა საგზაო მოძრაობის წესების დარღვევით, დიდი სისწრაფით მოძრავი ავტომანქანა შეაჩერეს, რომელსაც ნასვამ მდგომარეობაში მყოფი სასულიერო პირი რომან კ. მართავდა.

სამართალდამცველებმა რომან კ. საქართველოს ადმინისტრაციულ სამართალდარღვევათა კოდექსის 173-ე და 166-ე მუხლებით დააკავეს, რაც პოლიციისადმი დაუმორჩილებლობასა და წვრილმან ხულიგნობას გულისხმობს.

შსს-ს მტკიცებით, საპატრულო პოლიციის ეკიპაჟმა მას განუმარტა, რომ გადაჭარბებული სიჩქარით, მით უფრო, არაფხიზელ მდგომარეობაში ავტომანქანის მართვა იყო არა მხოლოდ კანონის დარღვევა, არამედ, საფრთხეს უქმნიდა თავად მძღოლის, მისი მგზავრებისა და სხვა მოქალაქეების სიცოცხლეს:

"სამართალდამცველებმა რომან კ.-ს არაერთგზის შესთავაზეს, რომ თავად მიიყვანდნენ შინ, რასაც მისი მხრიდან აგრესია მოჰყვა. სასულიერო პირმა სიტყვიერი შეურაცხყოფა მიაყენა საპატრულო პოლიციის თანამშრომლებს და არ დაემორჩილა მათ კანონიერ მოთხოვნას. პოლიციის განყოფილებაში გადაყვანის დროს, დაკავებულმა ავტომანქანაში თვითდაზიანებები მიიყენა. მას შესაბამისი სამედიცინო დახმარება გაეწია. ამჟამად სასულიერო პირი ხელწერილის საფუძველზეა გათავისუფლებული და მის მიმართ სამართლებრივი პროცედურები გრძელდება".

მღვდელი აცხადებს, რომ მანქანაში მას პატრულის თანამშრომლებმა სცემეს. კურიერთან საუბრისას, სასულიერო პირი ჰყვება, რომ ის ნასვამ მდგომარეობაში მართავდა ავტომობილს, რა დროსაც ლანჩხუთში პოლიციამ გააჩერა. მისი თქმით, მან ავტომობილი ქართული ოცნების ოფისთან გააჩერა და სამართალდამცველებს ბოდიში მოუხადა. სასულიერო პირის განცხადებით, პოლიციამ მას ხელბორკილები დაადო, მანქანაში ჩასვა და სცემა.

შსს: მღვდელმა პოლიციის მანქანაში თვითდაზიანებები მიიყენა