მსჯავრდებული ლაშა ჩაჩანიძე, რომელიც მე-6 პენიტენციურ დაწესებულებაში იხდის სასჯელს, ამტკიცებს, რომ საპყრობილის თანამშრომლები რეზინის ხელკეტებით ფიზიკურად გაუსწორდნენ. ამის მიზეზი, მისი თქმით, გიორგი დავითაძის მიმართ გამოხატული სოლიდარობა გახდა. ეს ინფორმაცია "ბათუმელებს" ჩაჩანიძის ადვოკატმა, ანა აკოფოვამ მიაწოდა.

უფლებადამცველის განცხადებით, ჩაჩანიძის სხეულზე ამ დრომდე შესამჩნევია დაზიანებები მუხლების, ხელებისა და ზურგის არეში. მსჯავრდებული მძიმე თავის ტკივილსაც უჩივის და განმარტავს, რომ ძალადობის პროცესში მას თავზე ძლიერად აწვებოდნენ, რათა წინააღმდეგობის გაწევა არ შესძლებოდა.

"ლაშა ჩაჩანიძეს სხეულზე აღენიშნება მრავლობითი დაზიანება: მუხლებზე, ხელებზე, ზურგზე… ასევე, ამბობს, რომ აქვს გაუსაძლისი თავის ტკივილები, რადგან ფიზიკური ძალადობის დროს, თავზე ძლიერად აწვებოდნენ, რომ წინააღმდეგობა არ გაეწია. ლაშას თქმით, მას რეზინის ხელკეტებით სცემეს… ტანსაცმლით დაუფარავ ნაწილებზეც კი ძალიან მკაფიოდ ეტყობა დაზიანებები", — თქვა ადვოკატმა "ბათუმელებთან" საუბრისას.

როგორც ანა აკოფოვამ აღნიშნა, იგი ბათუმის მე-3 პენიტენციურ დაწესებულებაში თავის დაცვის ქვეშ მყოფ პირს 5 ოქტომბერს შეხვდა. ჩაჩანიძემ მას უამბო, რომ ინციდენტს ადგილი 2 ოქტომბერს, რუსთავის მე-6 დაწესებულებაში ჰქონდა. აკოფოვას ცნობით, მას შემდეგ, რაც პატიმარმა გიორგი დავითაძეს შეძახილებით მხარდაჭერა გამოუცხადა, ის განცალკევებულ ოთახში შეიყვანეს და სცემეს.

ანა აკოფოვას ინფორმაციით, იმავე თარიღს დავითაძის სოლიდარობის გამო კიდევ რამდენიმე მსჯავრდებული ფიზიკურად დასაჯეს. 3 ოქტომბერს, ლაშა ჩაჩანიძე და კიდევ სამი პატიმარი მე-6 დაწესებულებიდან ბათუმის მე-3 პენიტენციურ დაწესებულებაში გადაიყვანეს, თუმცა ადვოკატის თქმით, ამ გადაადგილების მიზეზი მათთვის არავის აუხსნია.

სპეციალური პენიტენციური სამსახური პატიმრებზე ძალადობის ფაქტს კატეგორიულად გამორიცხავს. უწყებაში "ბათუმელებს" განუცხადეს, რომ "არანაირ ინციდენტს არ ჰქონია ადგილი". კითხვებზე იმის შესახებ, თუ რატომ აქვს მსჯავრდებულს დაზიანებები ან მიმდინარეობს თუ არა მოკვლევა, უწყებამ პასუხი არ გასცა, ხოლო სხვა დაწესებულებაში გადაყვანის მიზეზი პერსონალური მონაცემების დაცვის შესახებ კანონით ახსნა.

შეგახსენებთ, რომ გიორგი დავითაძე, რომელიც რუსთავის №6 პენიტენციურ დაწესებულებაში იხდის სასჯელს, აცხადებს, რომ დეესკალაციის ოთახში მასზე რამდენიმე ბადრაგმა სექსუალურად იძალადა. პენიტენციური სამსახური ბრალდებას კატეგორიულად უარყოფს. უწყებამ 2 ოქტომბერს გაავრცელა ვიდეოკადრები, სადაც მათი თქმით, გიორგი დავითაძის დეესკალაციის ოთახში შეყვანაა ასახული. კადრებში ჩანს დავითაძის ძალით შემოწმება და ფიზიკური დაპირისპირება, თუმცა ჩანაწერს ხმა არ აქვს. საქმეზე გამოძიება მიმდინარეობს, ხოლო სახალხო დამცველის აპარატის განცხადებით, ამ ეტაპზე ფიზიკური ძალადობის დამადასტურებელი მტკიცებულება არ უნახავთ.

4 ოქტომბერს პენიტენციურმა სამსახურმა გაავრცელა ცნობა იმის შესახებ, რომ 21:12 საათზე რუსთავის №6 პენიტენციურ დაწესებულებაში მყოფმა გიორგი დავითაძემ ადმინისტრაციის თანამშრომლისა და საკნის ვიდეოკამერის წინ გაურკვეველი მცირე ზომის საგანი დემონსტრაციულად გადაყლაპა. უწყების განცხადებით, მას ჯანმრთელობის მდგომარეობის შემდგომი მონიტორინგისთვის კლინიკა "ვივამედში" გადაყვანა შესთავაზეს, თუმცა დავითაძემ უარი განაცხადა. შესაბამისად, მისი ჯანმრთელობის მდგომარეობის 24-საათიან მონიტორინგს პენიტენციური დაწესებულების მედპერსონალი ახორციელებს.

ვრცლად გიორგი დავითაძის საქმეზე: