იუსტიციის მინისტრმა პაატა სალიამ "ტვ პირველთან" საუბრისას პირველი კომენტარი გააკეთა პატიმარ გიორგი დავითაძეზე, რომელმაც განაცხადა, რომ დეესკალაციის ოთახში მასზე ბადრაგმა სექსუალურად იძალადა.

პაატა სალია ამბობს, რომ ციხეში "დაცულია ყველა პატიმრის უსაფრთხოება", განცხადებას კი რამდენიმე საათში გააკეთებს და ჟურნალისტების ყველა კითხვას უპასუხებს.

"დაცულია ყველა პატიმრის უსაფრთხოება. ჯერ ვაკვირდებით მის ჯანმრთელობის მდგომარეობას, იცით გუშინდელი გარემოების შესახებ, რომ თვითონ განაცხადა უარი კლინიკაში გადაყვანაზე, დანარჩენზე ცოტა მოგვიანებით გავაკეთებთ კომენტარს და ნებისმიერ შეკითხვაზე გიპასუხებთ", — უთხრა პაატა სალიამ "ტვ პირველის" ჟურნალისტს.

შეგახსენებთ, რომ გიორგი დავითაძე, რომელიც რუსთავის №6 პენიტენციურ დაწესებულებაში იხდის სასჯელს, აცხადებს, რომ დეესკალაციის ოთახში მასზე რამდენიმე ბადრაგმა სექსუალურად იძალადა. პენიტენციური სამსახური ბრალდებას კატეგორიულად უარყოფს. უწყებამ 2 ოქტომბერს გაავრცელა ვიდეოკადრები, სადაც მათი თქმით, გიორგი დავითაძის დეესკალაციის ოთახში შეყვანაა ასახული. კადრებში ჩანს დავითაძის ძალით შემოწმება და ფიზიკური დაპირისპირება, თუმცა ჩანაწერს ხმა არ აქვს. საქმეზე გამოძიება მიმდინარეობს, ხოლო სახალხო დამცველის აპარატის განცხადებით, ამ ეტაპზე ფიზიკური ძალადობის დამადასტურებელი მტკიცებულება არ უნახავთ.

გუშინ, 4 ოქტომბერს პენიტენციურმა სამსახურმა გაავრცელა ცნობა იმის შესახებ, რომ 21:12 საათზე რუსთავის №6 პენიტენციურ დაწესებულებაში მყოფმა გიორგი დავითაძემ ადმინისტრაციის თანამშრომლისა და საკნის ვიდეოკამერის წინ გაურკვეველი მცირე ზომის საგანი დემონსტრაციულად გადაყლაპა. უწყების განცხადებით, მას ჯანმრთელობის მდგომარეობის შემდგომი მონიტორინგისთვის კლინიკა "ვივამედში" გადაყვანა შესთავაზეს, თუმცა დავითაძემ უარი განაცხადა. შესაბამისად, მისი ჯანმრთელობის მდგომარეობის 24-საათიან მონიტორინგს პენიტენციური დაწესებულების მედპერსონალი ახორციელებს.