მატარებლების მწარმოებელი შვეიცარიული კომპანია Stadler აცხადებს, რომ საქართველოს რკინიგზის მიერ შეძენილი მატარებლები შეესაბამება საქართველოს რკინიგზის ინფრასტრუქტურის გაბარიტებს და მორგებულია მასზე. შტადლერის განცხადება საქართველოს რკინიგზამ გაავრცელა, სადაც წერია, რომ აღნიშნული მატარებლები შემოწმებულია არა მხოლოდ ნახაზების შედარებით, არამედ პრაქტიკული გაზომვის გზითაც:

"საგულისხმოა, რომ შესყიდვის ხელშეკრულების გაფორმებამდე ტექნიკური მოთხოვნების შესაბამისობა შემოწმებული და დადასტურებულია გერმანიის რკინიგზის (Deutsche Bahn AG – DB international) შესაბამისი ექსპერტების მიერ და გაცემულია დადებითი დასკვნა.

„ჩვენი პროდუქტის, მოცემულ შემთხვევაში, Stadler KISS-ის 1520 მმ-იან ლიანდაგზე საოპერაციოდ დაშვება განისაზღვრება ГОСТ 9238-83-ით "ნაგებობათა და რკინიგზის 1520 (1524 მმ) სივრცის მოძრავი შემადგენლობის მიახლოების გაბარიტები". აღნიშნული ГОСТ განსაზღვრავს მაქსიმალურად დასაშვებ ზომებს მატარებლებისთვის და მიახლოებისას მინიმალურად დასაშვებ ზომებს ისეთი ნიღბებისთვის, როგორიც არის გვირაბები, ხიდები და ბაქნები. მოძრავი შემადგენლობისთვის არსებობს სამი ძირითადი გაბარიტი (Т, 1-Т, ВМ), რომელთაგანაც "Т" ყველაზე მოცულობითია. ხელოვნურ ნაგებობებთან მიახლოებისთვისაც არსებობს ზუსტად ანალოგიური კლასიფიკაციები, შესაბამისი რეზერვის გათვალისწინებით, რათა მოძრავი შემადგენლობა არ შეეხოს ნაგებობებს, მათ შორის საქართველოს რკინიგზაზე არსებულ გვირაბებს და სხვა ხელოვნურ ნაგებობებს.

საქართველოს რკინიგზის მიერ შეძენილი "Stadler KISS" მატარებლები შეესაბამება "Т" გაბარიტს და იგი შემოწმებულია არა მხოლოდ ნახაზების შედარებით, არამედ პრაქტიკული გაზომვის გზითაც".

შტადლერის განცხადებით, მგზავრთა განსათავსებლად მეორე სართულის მოწყობა დასაშვებია, ვინაიდან ძველი, ერთსართულიანი მატარებლები არ გამოიყენებენ გაბარიტის სრულ სიმაღლეს, ხოლო ორსართულიანი Stadler KISS მატარებელი ვერც კი ავსებს "Т" გაბარიტს:

"ორსართულიანი ელექტრო "KISS" მატარებლები, რომლებიც საქართველოს რკინიგზისთვისაა განკუთვნილი, შვეიცარიელი ინჟინრების მიერ არის შემუშავებული, რა დროსაც მათ შვეიცარიის, გერმანიის, ავსტრიისა და ლუქსემბურგის, ანუ ევროპელი დამკვეთებისთვის დამზადებული, მსგავსი კონსტრუქციის მატარებლები შექმნეს".

საქართველოს რკინიგზამ შტადლერისგან ორსართულიანი მატარებლები ჯამში 40 მილიონ ევროდ შეიძინა. აღნიშნული შემადგენლობები თბილისი-ბათუმის მარშრუტზე იმოძრავებენ. 23 ივნისს გიორგი ვაშაძის თანაგუნდელებმა გაავრცელეს ინფორმაცია, რომ აღნიშნული მატარებლები ვერ ეტევიან ქართულ გვირაბებში.