კონგრესმენმა ჯო უილსონმა აშშ-ის წარმომადგენელთა პალატაში "კავკასიაზე ჩინეთის კონტროლთან გამკლავების აქტის" მიღებამდე სიტყვით გამოსვლისას განაცხადა, რომ ქართული ოცნების არალეგიტიმური რეჟიმი, ქართველი ხალხისა და ამერიკული ინტერესების საწინააღმდეგოდ, საქართველოს ჩინეთზე, რუსეთსა და ირანზე ყიდის. მისივე თქმით, საქართველოში არჩევნები გაყალბდა და ამ ფონზე გავრცელდა ანტიამერიკული პროპაგანდა, რომელიც დონალდ ტრამპს "დიფ სტეიტის" აგენტად მოიხსენიებს.

"ქართული ოცნების არალეგიტიმური რეჟიმი ქვეყნის ჩინეთის კომუნისტური პარტიისთვის და სამხედრო დამნაშავე პუტინისა და ირანისთვის მიყიდვის პროცესშია — რაც კიდევ ერთხელ ხაზს უსვამს, რომ ეს ხდება ქართველი ხალხის ნებისა და ამერიკის შეერთებული შტატების ინტერესების საწინააღმდეგოდ.

საქართველოში არჩევნები გაყალბდა. ამ ფონზე, მათ გაავრცელეს ყველაზე საზიზღარი ანტიამერიკული პროპაგანდა და მუდმივად შეურაცხყოფენ პრეზიდენტ ტრამპს, ადანაშაულებენ რა მას, ვციტირებ: "დიფ სტეიტის აგენტად" ყოფნაში", — განაცხადა კონგრესმენმა.

ჯო უილსონმა თავის სიტყვაში ასევე აღნიშნა, რომ გასულ კვირას ქართული ოცნების მარიონეტმა მინისტრმა აშშ-ის სახელმწიფო მდივანი ტყუილში დაადანაშაულა. კონგრესმენმა ხაზი გაუსვა იმასაც, რომ შუა დერეფნის საზღვაო მარშრუტმა საქართველოზე უნდა გაიაროს.

"სინამდვილეში, ჩვენ ვიცით, რომ ლეგიტიმური პრეზიდენტი სალომე ზურაბიშვილი პრეზიდენტ დონალდ ტრამპის ინაუგურაციის ძვირფასი სტუმარი იყო, თბილისში კი თითქმის ყოველდღიურად იმართება დემონსტრაციები, სადაც ადამიანებს გამოაქვთ პრეზიდენტ დონალდ ტრამპის გიგანტური პოსტერები, რითაც გამოხატავენ თავიანთ სიყვარულსა და პატივისცემას პრეზიდენტ ტრამპისა და შეერთებული შტატების მიმართ.

ქართული ოცნების მარიონეტმა პრემიერმინისტრმა სულ რაღაც გასულ კვირას ჩვენს სახელმწიფო მდივანს, მარკო რუბიოს, ტყუილში დასდო ბრალი. ამ გარიყული რეჟიმის ქცევა საფრთხეს უქმნის ყველაფერს, რასაც პრეზიდენტმა ტრამპმა სამხრეთ კავკასიაში მიაღწია, და ეს უნდა შეიცვალოს.

შუა დერეფნის საზღვაო მარშრუტმა საქართველოზე უნდა გაიაროს, ჩინეთის კომუნისტური პარტია კი, როგორც თავმჯდომარემ მიუთითა, მიზნად ისახავს რეგიონის სტრატეგიული ღრმაწყლოვანი პორტის — შავ ზღვაზე მდებარე ანაკლიის პორტის დაუფლებასა და კონტროლს", — განაცხადა ჯო უილსონმა.

თავის სიტყვაში კონგრესმენმა სომხეთში გამართულ საპარლამენტო არჩევნებზეც ისაუბრა და ნიკოლ ფაშინიანს გამარჯვება მიულოცა. მან ასევე აღნიშნა, რომ ქართული ოცნებისგან განსხვავებით, ფაშინიანი თანამშრომლობს შეერთებულ შტატებთან და აზერბაიჯანის პრეზიდენტ ილჰამ ალიევთან რეგიონში რუსული გავლენის აღმოსაფხვრელად. ჯო უილსონის თქმით, ქართულმა ოცნებამ უნდა უარყოს თავისი ანტიამერიკული კურსი, გაათავისუფლოს პოლიტპატიმრები და შეწყვიტოს პოლიტიკურად მოტივირებული დევნა.

"ვულოცავ მეზობელი სომხეთის პრემიერმინისტრ ნიკოლ ფაშინიანს გუშინდელ არჩევნებში მოპოვებულ შთამბეჭდავ გამარჯვებას. ქართული ოცნებისგან განსხვავებით, ფაშინიანი თანამშრომლობს შეერთებულ შტატებთან და აზერბაიჯანის პრეზიდენტ ილჰამ ალიევთან რეგიონში რუსული გავლენის აღმოსაფხვრელად და NATO-ს წევრ, ჩვენს მეტად დაფასებულ მოკავშირე თურქეთთან ურთიერთობების ნორმალიზებისთვის. ეს არის შანსი, რომელიც 3000 წელიწადში ჩნდება რეგიონში სტაბილურობის, მშვიდობისა და კეთილდღეობისთვის. მე მადლობელი ვარ პრეზიდენტ ტრამპის სომხეთსა და აზერბაიჯანს შორის სამშვიდობო შეთანხმების ორგანიზებისთვის.

ქართული ოცნების კოშმარულმა რეჟიმმა, სამართლიანი და თავისუფალი არჩევნების გზით, უნდა უარყოს თავისი ანტიამერიკული კურსი, გაათავისუფლოს პოლიტიკური პატიმრები და შეწყვიტოს პოლიტიკურად მოტივირებული დევნა, უზრუნველყოს სამართლიანი საარჩევნო გარემო, გააუქმოს დრაკონული კანონები, რომლებიც ახრჩობს აშშ-ის ბიზნესს, და ბოლო მოუღოს სიტყვის თავისუფლების რეპრესიებს", — თქვა უილსონმა.

კონგრესმენის განმარტებით,"კავკასიაზე ჩინეთის კონტროლის აღკვეთის აქტი" უზრუნველყოფს ქვეყანაში ჩინური და რუსული ფარული ოპერაციების გამჟღავნებას. მისივე თქმით, აშშ-სა და საქართველოს შორის ძლიერი ურთიერთობა, რომელიც აქამდე არსებობდა უნდა აღდგეს და ეს შეუძლებელი იქნება "თუ არ გვექნება სამართლიანი და თავისუფალი არჩევნები".

"კავკასიაზე ჩინეთის კონტროლის აღკვეთის აქტი" (The Countering China's Control of the Caucasus Act) უზრუნველყოფს ქვეყანაში ჩინური და რუსული ფარული ოპერაციების გამჟღავნებას და იმას, რომ შეერთებულმა შტატებმა სერიოზულად აწონ-დაწონოს, უნდა დარჩეს თუ არა საქართველო დახმარების ერთ-ერთ მთავარ მიმღებად იმ ფონზე, როდესაც ის თავის პროპაგანდაში თითქმის ყოველდღიურად ესხმის თავს ამერიკას.

ქართველი ჯარისკაცები მამაცურად იბრძოდნენ ამერიკელებთან ერთად ავღანეთსა და ერაყში, ჩვენს თავმჯდომარესთან ერთად, და ჩვენ ვიცით, რომ საქართველო შეერთებული შტატების ახლო პარტნიორი და მოკავშირე იყო. ჩვენ უნდა აღვადგინოთ ის ძლიერი ურთიერთობა, რომელიც არსებობდა შეერთებულ შტატებსა და საქართველოს შორის. მისი ნორმალიზება შეუძლებელი იქნება, თუ არ გვექნება სამართლიანი და თავისუფალი არჩევნები. მოვუწოდებ ჩემს კოლეგებს, მხარი დაუჭირონ ამ კანონმდებლობას", — აღნიშნა კონგრესმენმა.

შეგახსენებთ, აშშ-ის წარმომადგენელთა პალატამ მიიღო კანონპროექტო, რომელიც ჩინეთის მიერ კავკასიაში კონტროლის წინააღმდეგ ბრძოლას ეხება. კანონპროექტი ასახავს ვაშინგტონში მზარდ შეშფოთებას იმის შესახებ, რომ ქართული ოცნება შეერთებული შტატების მთავარი მოწინააღმდეგეების მიერ კონტროლირებად ორბიტაზე გადადის.