ამერიკელი კონგრესმენის, ჯო უილსონის მიერ საქართველოზე დასმული კითხვის საპასუხოდ აშშ-ს სახელმწიფო მდივანმა მარკო რუბიომ განაცხადა, რომ ქართულ მხარეს "მკაფიოდ განუმარტეს, რა არის საჭირო ამერიკის შეერთებულ შტატებთან ურთიერთობების გასაუმჯობესებლად და იმედოვნებენ, რომ შეძლებენ საქართველოში არსებული მოვლენების განვითარების ტრაექტორიის შეცვლას.

უილსონის თქმით, "პროირანული რეჟიმი და ჩინეთის კომუნისტური პარტია მხარს უჭერენ ქართული ოცნების მთავრობას, რომელიც არალეგიტიმურია. საფრთხეს უქმნის ამერიკის [რეგიონში] წვდომას. საქართველოში ჩატარდა გაყალბებული არჩევნები. ამის გათვალისწინებით, ისინი ხელს უწყობენ ისლამური რევოლუციის გუშაგთა კორპუსს და თავს არიდებენ თეირანზე შემოღებულ სანქციებს თეირანში". კონგრესმენმა რუბიოს ჰკითხა — რა უნდა გაკეთდეს იმისათვის, რომ რეაგირება მოახდინოს აშშ-მა სწრაფად მზარდ რადიკალიზაციაზე, რომელსაც ქართული ოცნების მთავრობა უწყობს ხელს საქართველოში?

სახელმწიფო მდივანი უილსონს დაეთანხმა, რომ მის მიერ ჩამოთვლილი საკითხვები მათი შეშფოთების საკითხს წარმოადგენს, მაგრამ მას შემდეგ ქართულმა მხარემ "გადადგა გარკვეული ნაბიჯები, რაც მიანიშნებს, რომ სურთ ამერიკის შეერთებულ შტატებთან ურთიერთობების გაუმჯობესება".

"საქართველოს საკითხზე თქვენ მართალი ხართ — ყველაფერი, რაც ახლა ჩამოთვალეთ, ჩვენი შეშფოთების საგანია.

მას შემდეგ მათ გადადგეს გარკვეული ნაბიჯები, რაც მიგვანიშნებს, რომ სურთ ამერიკის შეერთებულ შტატებთან ურთიერთობების გაუმჯობესება. ჩვენ მკაფიოდ განვუმარტეთ, თუ რა არის ამისთვის საჭირო და რა პირობების შესრულებას მოვითხოვთ. მათგან მივიღეთ გარკვეული პოზიტიური სიგნალები.

შესაბამისად, ჩვენი იმედია, რომ შევძლებთ შევცვალოთ მოვლენების განვითარების ის ტრაექტორია, რომელზეც საქართველო დღეს იმყოფება. ჩვენ, რა თქმა უნდა, ვაცნობიერებთ, რომ თქვენ მიერ ჩამოთვლილი თითოეული საკითხი ჩვენთვის კვლავაც ძველ პრობლემად რჩება.

მათ თავად გვკითხეს, თუ რა არის საჭირო აშშ-სთან ურთიერთობების გასაუმჯობესებლად. ჩვენ მივაწოდეთ პასუხი და ვიმედოვნებთ, რომ ამ საფუძველზე შევძლებთ წინსვლას და, იმედია, შეიცვლება არა მხოლოდ ჩვენი ურთიერთობები საქართველოსთან, არამედ მათი ქცევა", — განაცხადა რუბიომ.