"სამი ბრალი მაქვს და უკვე მალე დასახვრეტიც ვიქნები", — განაცხადა პარტია მოქალაქეების ლიდერმა, ალეკო ელისაშვილმა სასამართლო პროცესზე, რომელიც ტერორისტული აქტის კიდევ ერთ ეპიზოდს ეხება.

მოსამართლის შეკითხვაზე, იყო თუ არა ის წარსულში ნასამართლევი, პოლიტიკოსმა უპასუხა: "სამი ბრალი მაქვს და უკვე მალე დასახვრეტიც ვიქნები".

საქმის ეს კონკრეტული ეპიზოდი 2025 წლის 4 მაისს საქალაქო სასამართლოს არქივის შენობაში გაჩენილ ხანძარს უკავშირდება. მას შემდეგ, რაც მოსამართლე მეია მელქაძემ ბრალდებულს მისი უფლებები და ბრალის შინაარსი განუმარტა, ელისაშვილმა წარდგენილი ბრალდება კატეგორიულად უარყო:

"არა, არანაირად, ამას ნამდვილად მაბრალებენ. ცეცხლი არც ტერორისტული მიზნით დამინთია და არც გასათბობად", — განაცხადა ელისაშვილმა პროცესზე (მის სიტყვას IPN ავრცელებს).

ოფიციალური ბრალდების მიხედვით, პოლიტიკოსს გამოძიება სისხლის სამართლის კოდექსის 19-323-ე მუხლის პირველ ნაწილს ედავება. აღნიშნული მუხლი ტერორისტულ აქტს (აფეთქება, ცეცხლის წაკიდება, იარაღის გამოყენება ან სხვა მსგავსი ქმედება) გულისხმობს, რომელიც ჩადენილია ტერორისტული მიზნით და საფრთხეს უქმნის ადამიანის სიცოცხლეს ან იწვევს მძიმე ქონებრივ ზიანს. ბრალის დამტკიცების შემთხვევაში, აღნიშნული ქმედება 10-დან 15 წლამდე ვადით თავისუფლების აღკვეთას ითვალისწინებს.