დაკავებულმა პოლიტიკოსმა, პარტია ხალხისთვის ერთ-ერთმა ლიდერმა, ალეკო ელისაშვილმა სასამართლო სხდომაზე პროკურორს მიმართა. მისი განმარტებით ორჯერ აუკრძალეს ციხიდან დარეკვა, იმ მიზეზით, რომ მოწმეებზე ზემოქმედება არ მოახდინოს. ალეკო ელისაშვილმა ასევე დასვა კითხვა მისი სახლიდან ამოღებული ლეპტოპების დაბრუნების შესახებ. მისი განმარტებით სადიზმია ის, რომ ცოლ-შვილის ნახვის საშუალებას არ აძლევენ.

"ერთი კითხვა მაქვს, როცა დამაკავეს, ჩემს სახლში ჩხრეკა ჩატარდა, მეუღლის და შვილების ლეპტოპები წაიღეს, როდის დაუბრუნებთ? ჩემს ლეპტოპში ძველი თბილისის ფოტოები მაქვს, არ წამიშალოთ.

ორჯერ ამიკრძალეს დარეკვა ციხიდან, რომ მოწმეებზე ზემოქმედება არ მოვახდინო. მოწმეები არიან მანდატურები, მათთან ჩხუბის კადრები წარმოდგენილია, ზეწოლაც რომ მოვახდინო, იმ კადრებს ხომ ვერ წაშლით?

ციხეში ცოლ-შვილი რომ შემოვიდეს, მოწმეზე ზეწოლა როგორ უნდა მოვახდინო, ტექნიკურად ამიხსენით. ეს არის სადიზმი. ჯერ ხომ ციხეში გამომამწყვდიეთ, გინდოდათ ჩემზე შური გეძიათ? კი ბატონო, ხომ ვზივარ ჩუმად. მკაცრი რეჟიმია, მაგრამ მშვენივრად ვგრძნობ თავს, ეს სადიზმი რა უბედურებაა? შვილებს რომ შევხვდე, რამეს დავაშავებ? ღამე როგორ გძინავთ? რას მიკრძალავთ, შვილების მოფერებას? ნამუსი როგორ არ გაქვთ? სხვა რამე ამიკრძალეთ, ციხეში ვარ",— თქვა ელისაშვილმა (მის მიმართვას IPN ავრცელებს).

შეგახსენებთ, ალეკო ელისაშვილი 29 ნოემბერს დააკავეს. შინაგან საქმეთა სამინისტროს ინფორმაციით, მან 29 ნოემბერს, დილით, თბილისის საქალაქო სასამართლოს კანცელარიის შენობის დაწვა სცადა.