თბილისის საქალაქო სასამართლომ ოპოზიციონერი პოლიტიკოსი ალეკო ელისაშვილი კვლავ პატიმრობაში დატოვა. ის ტერორისტული აქტის ჩადენის მცდელობის ფაქტზეა ბრალდებული.

ბრალდების მხარემ აღკვეთის ღონისძიების სახით პატიმრობის ძალაში დატოვების შუამდგომლობა დააყენა, ხოლო დაცვის მხარემ აღკვეთის ღონისძიების, პატიმრობის, საერთოდ გაუქმების ან არ გაუქმების შემთხვევაში, გირაოს შეფარდების შუამდგომლობა დააყენა. საბოლოოდ, მოსამართლემ დააკმაყოფილა ბრალდების მხარის შუამდგომლობა და ალეკო ელისაშვილი პატიმრობაში დატოვა.

ალეკო ელისაშვილის ადვოკატის, არჩილ ჩოფიკაშვილის განცხადებით ელისაშვილი პოლიტიკური დევნის და პირადი შურისძიების მსხვერპლი პოლიტიკოსია.

ალეკო ელისაშვილი დღემდე არის ყველაზე მაღალი რისკის სასჯელაღსრულების დაწესებულებაში, როცა ამის არანაირი აუცილებლობა არ არის. აბსოლუტურად განსხვავებულ მოპყრობას აქვს მის მიმართ იმ მოტივით, რომ მოწმეებზე არ მოახდინოს ზემოქმედება. მოწმეები არიან პატრულის და მანდატურის თანამშრომლები.

პარლამენტის თავმჯდომარემ ბრალდებული წარმოაჩინა ისე, რომ გეგონება მსოფლიოში პირველი ტერორისტია, ბრიფინგები მიუძღვნეს, რის შემდეგაც მას ტერორიზმის ბრალდება წარუდგინეს. ალეკო ელისაშვილი ოპოზიციური საქმიანობის განო არის ამ ყველაფრის მსხვერპლი.

ჩემი პატივისცემის მიუხედავად, ვერ წარმომიდგენია, რომ რომელიმე მანდატურის თანამშრომელი დამიზნებულ იარაღს მიუშვერდა შუბლს და საკუთარ სიცოცხლეს შესწირავდა სასამართლოს შენობას. ალეკო ელისაშვილის დემონიზაცია აღრმავებს მოცემულობას, რომ ის არის პოლიტიკური დევნის და პირადი შურისძიების მსხვერპლი პოლიტიკოსი", — განაცხადა არჩილ ჩოფიკაშვილმა (ციტატას IPN ავრცელებს)

შეგახსენებთ, ალეკო ელისაშვილი 2025 წლის 29 ნოემბერს, თბილისის საქალაქო სასამართლოს კანცელარიის დაწვის მცდელობისთვის დააკავეს და ბრალი სისხლის სამართლის კოდექსის 323-ე მუხლის პირველი ნაწილის მიხედვით წარუდგინეს, რაც ტერორისტული აქტის მცდელობას გულისხმობს. აღნიშნული დანაშაული 10-დან 15-წლამდე თავისუფლების აღკვეთას ითვალისწინებს.