ბრალდებულმა პოლიტიკოსის, ალეკო ელისაშვილის ადვოკატის, არჩილ ჩოფიკაშვილის ინფორმაციით, პროკურატურამ მისი დაცვის ქვეშ მყოფისგან სუნის ნიმუშის აღება მოითხოვა. 2025 წლის მაისში უცნობმა პირმა სასამართლოს არქივს ცეცხლი წაუკიდა, რის შედეგადაც საქმეების ნაწილი განადგურდა.

ჩოფიკაშვილმა ჟურნალისტებთან საუბრისას განაცხადა, რომ პროკურატურა ცდილობს ალეკო ელისაშვილის "დემონიზაცია" მოახდინოს და აღნიშნული საქმე გადააბრალოს.

"დაგვიკავშირდნენ თბილისის პროკურატურიდან. გამომძიებელმა გვაცნობა, რომ იძიებენ სისხლის სამართლის საქმეს 2025 წლის მაისიდან, რა დროსაც უცნობმა პირმა ცეცხლი წაუკიდა სასამართლოს არქივს და გარკვეული საქმეების ნაწილი თურმე დაიწვა კიდეც.

აღნიშნული საქმის გამოძიება თითქმის ერთი წელია, მიმდინარეობს 187 მუხლით.
ამ საქმეზე, პოლიციის პატაკის მიხედვით ჰქონდათ ეჭვი და ითხოვეს, რომ აეღოთ სუნის ნიმუში ბრალდებული ალეკო ელისაშვილისგან. ეს ყველაფერი კიდევ ერთი დადასტურებაა იმისა, რომ პროკურატურა ცდილობს ოპოზიციონერი პოლიტიკოსის დემონიზაციას. ცდილობენ, გააჩინონ ეჭვი, რომ თითქოს სხვა საქმეებშიც ეჭვმიტანილია. თვითონ ეს ფაქტი მიანიშნებს, რომ პოლიტიკოსის დემონიზაციისა და დისკრედიტაციის პროცესი გრძელდება," — განაცხადა ადვოკატმა.

შეგახსენებთ, ალეკო ელისაშვილი 29 ნოემბერს დააკავეს. შინაგან საქმეთა სამინისტროს ინფორმაციით, მან 29 ნოემბერს, დილით, თბილისის საქალაქო სასამართლოს კანცელარიის შენობის დაწვა სცადა. პროკურატურამ ელისაშვილს ბრალი 30 ნოემბერს წარუდგინა. უწყების მიერ გავრცელებულ ინფორმაციაში წერია, რომ პოლიტიკოსს ბრალი "თბილისის საქალაქო სასამართლოში ტერორისტული აქტის ჩადენის მცდელობის ფაქტზე" წარედგინა.