მოკლული მასწავლებლის, გიგა ავალიანის საქმეზე ალექსანდრე გაბაშვილსა და გიორგი რიკაძეს 14-14 წლით, დემეტრე ჩიქოვანს კი 9 წლით თავისუფლების აღკვეთა მიესაჯათ — განაჩენი მოსამართლე რომეო ტყეშელაშვილმა გამოიტანა.

არასრულწლოვანთა მართლმსაჯულების კოდექსის თანახმად, მსჯავრდებულებს სასჯელი 1/4-ით შეუმცირდათ, რაც გულისხმობს, რომ გაბაშვილი და რიკაძე 10 წელსა 6 თვეს გაატარებენ პატიმრობაში, დემეტრე ჩიქოვანი კი 6 წელსა და 9 თვეს.

"სასამართლომ დამნაშავედ ცნო სამივე ბრალდებული. ბრალდების მხარემ გონივრულ ეჭვს მიღმა სტანდარტით დაადასტურა ბრალად წარდგენილი ქმედებები... საუბარი იყო დახმარებაზე, არ მიგვიტოვებიაო, მაგრამ სასამართლო აკვირდებოდა გარემოებებს, სასამართლო აღნიშნავს, რომ სინანული, ახალგაზრდა ადამიანი არასრულწლოვანი ბრალდებულების ქმედებით აღარ არის, სასამართლომ ვერ მოისმინა. ბრალდებულებს ერთი სიტყვა რომ ეთქვათ, თუნდაც, ბოდიში, სასამართლოს არ მოუსმენია.

სინანული არის ის, რომ ისინი პატიმრობაში არიან.

მობილური ტელეფონი სასწრაფოში დასარეკად არ გამოუყენებიათ, მობილური ტელეფონი გადასაღებად გამოიყენეს და ასეთ მდგომარეობაში მყოფი პირის დამცირება მოახდინეს.
ყოველივე, რაც მოვისმინეთ, სისასტიკეზე მიუთითებს, სინანული მთელი ამ პროცესების განმავლობაში და არც საბოლოო სიტყვებში არ მოგვისმენია.

მოვისმინეთ, რომ ერთ-ერთი შესვენების დროს, დაზარალებულის ოჯახის წევრებს "თვალებს უქაჩავდნენ", მოწმისგანაც მოვისმინეთ, მოწმეზეც იყო აგრესიული გამოხატულება. სასამართლო მიანიშნებს, რომ აღარ არის ახალგაზრდა ადამიანი ისევ ახალგაზრდა ადამიანების მეშვეობით.

სასამართლო რომელიც ახლა სასჯელს გამოაცხადებს, დამაფიქრებელი იქნება ყველა მერყევი ელემენტისთვის, ვისაც აგრესიული ქმედება ცხოვრებაში ნორმად მიაჩნია. მხოლოდ ქმედებით არ ხდება დამცირება, სიტყვითაც ხდება.

სასამართლო იქნება უმკაცრესი ყველა შემთხვევაში," —განაცხადა ტყეშელაშვილმა.

შეგახსენებთ, ალექსანდრე გაბაშვილსა და გიორგი რიკაძეს ბრალდება სსკ-ის 117-ე მუხლის მეოთხე ნაწილით ჰქონდათ წარდგენილი, რაც ჯანმრთელობის განზრახ მძიმე დაზიანებას გულისხმობს ჯგუფურად, რასაც გარდაცვალება მოჰყვა.

გარდა გიგა ავალიანის საქმისა, სამივე არასრულწლოვანს ჯგუფური ძალადობის სხვა ეპიზოდებზეც აქვთ ბრალი წარდგენილი.

მეტი გიგა ავალიანის მკვლელობის შესახებ წაიკითხეთ: