რუსი მოთხილამურე, დარია ნეპრიაევა, კვირას ქალთა 50 კილომეტრიანი კლასიკური სტილით სარბოლო დისტანციიდან დისკვალიფიცირდა მას შემდეგ, რაც რბოლის მიმდინარეობისას, აღჭურვილობის შეცვლის დროს, სხვა სპორტსმენის თხილამურები აიღო.

ნეპრიაევამ, რომელიც ნეიტრალური სტატუსით ასპარეზობდა, შეცდომით გერმანელი მოთხილამურის, კატარინა ჰენინგ დოტცლერის თხილამურები აიღო.

მან სრიალი გააგრძელა, თუმცა საბოლოოდ რბოლიდან დისკვალიფიცირდა. შეჯიბრი შვედმა ება ანდერსონმა მოიგო.

გერმანიის წარმომადგენელი კატარინა ჰენინგ დოტცლერი და ნეიტრალური სახელით მოასპარეზე დარია ნეპრიაევა ქალთა 50 კმ მას-სტარტის კლასიკურ რბოლაში

ფოტო: REUTERS/Stephanie Lecocq

ჰენინგ დოტცლერმა, რომელმაც მეცხრე ადგილი დაიკავა, განაცხადა, რომ სათადარიგო თხილამურები, რომელთა გამოყენებაც მოუწია, იმაზე ნელა მიდიოდა, ვიდრე ის წყვილი, რომლითაც ასპარეზობას გეგმავდა. თუმცა, მისი თქმით, უფრო დიდი პრობლემა იყო თხილამურების ქვედა მხარეს მიმაგრებული პლასტმასის დეტალი, რომლის მოხსნაც მას კვების ზონაში გაჩერებისას მოუწია.

"ეს ყველაზე სწრაფი წყვილი არ იყო. დილით ოთხი წყვილი თხილამური გამოვცადეთ და ეს, ალბათ, მესამე ან მეოთხე იყო. განსხვავებაა, მაგრამ ასეთი რამ სპორტში ხდება", — თქვა მან.

23 წლის ნეპრიაევამ ინციდენტისთვის ბოდიში მოიხადა და თხილამურები დააბრუნა.

საერთაშორისო ოლიმპიურმა კომიტეტმა რუს და ბელარუს სპორტსმენებს ოლიმპიურ თამაშებში მონაწილეობა აუკრძალა მას შემდეგ, რაც 2022 წლის თებერვალში მოსკოვი უკრაინაში შეიჭრა.

მიუხედავად ამისა, ზოგიერთ რუს და ბელარუს სპორტსმენს მილანი–კორტინას ოლიმპიადაზე მონაწილეობის უფლება მიეცა ინდივიდუალური ნეიტრალური სპორტსმენის სტატუსით: ეროვნული დროშისა და ჰიმნის გარეშე.

ასევე ნახეთ: