პარალიმპიურ თამაშებზე რუსი სპორტსმენები რუსული დროშის ქვეშ 2014 წლის შემდეგ პირველად გამოვლენ და ოქროს მედლის მოპოვების შემთხვევაში ქვეყნის ჰიმნიც შესრულდება.

სამშაბათს გაკეთებული ეს განცხადება მიიჩნევა კიდევ ერთ ნიშნად, რომ რუსეთი და მისი ეროვნული იდენტობა სრულად აღდგება 2028 წლის ლოს-ანჯელესის ზაფხულის ოლიმპიურ თამაშებამდე. საერთაშორისო პარალიმპიურმა კომიტეტმა (IPC) განაცხადა, რომ რუსეთის ეროვნულმა პარალიმპიურმა კომიტეტმა მილანი-კორტინას მომავალი პარალიმპიური თამაშებისთვის ექვსი კვოტა მიიღო.

აქვე აღსანიშნავია, რომ მიმდინარე ზამთრის ოლიმპიურ თამაშებზე საერთაშორისო ოლიმპიურმა კომიტეტმა უკრაინელ სპორტსმენს, ვლადისლავ ჰერასკევიჩს აუკრძალა ვარჯიშებსა და შეჯიბრებებში გამოიყენოს ჩაფხუტი, რომელზეც უკრაინის წინააღმდეგ რუსეთის მიერ დაწყებული ომის შედეგად დაღუპული უკრაინელი სპორტსმენების, მათ შორის წინა წლების ოლიმპიური თამაშების მონაწილეთა ფოტოებია.

ეს იქნება პირველი შემთხვევა, როცა რუსეთის დროშა პარალიმპიურ თამაშებზე აფრიალდება, ბოლოს ეს 2014 წლის სოჭის თამაშებისას მოხდა. მაშინ რუსეთის სპორტსმენები სახელმწიფო მხარდაჭერით განხორციელებული დოპინგის პროგრამის გამო დასაჯეს, ხოლო სანქციები ქვეყნის მიმართ 2022 წელს უკრაინაში შეჭრის შემდეგაც გაგრძელდა.

თუ პარალიმპიელი ოქროს მედალს მოიპოვებს, ეს იქნება პირველი შემთხვევა, როცა უკრაინაში შეჭრის შემდეგ, რუსეთის ჰიმნი დიდ საერთაშორისო სპორტულ ღონისძიებაზე გაისმება.

ამის გამო, უკრაინის ოფიციალური პირები ზამთრის პარალიმპიურ თამაშებს ბოიკოტს გამოუცხადებენ, განაცხადა კიევმა ოთხშაბათს, მას შემდეგ, რაც საერთაშორისო პარალიმპიურმა კომიტეტმა რუს და ბელარუს სპორტსმენებს თავიანთი ეროვნული დროშის ქვეშ ასპარეზობის უფლება მისცა. ევროკავშირის სპორტის კომისარმა გლენ მიკალეფმაც თქვა, რომ გახსნის ცერემონიას გამოტოვებს.

"სანამ რუსეთის ომი უკრაინის წინააღმდეგ გრძელდება, ვერ დავუჭერ მხარს იმ ეროვნული სიმბოლოების, დროშების, ჰიმნების და ფორმების დაბრუნებას, რომლებიც ამ კონფლიქტთან განუყოფლად არის დაკავშირებული", — დაწერა მან X-ზე.

საერთაშორისო პარალიმპიურმა კომიტეტმა რუსეთისა და ბელარუსის მიმართ დაწესებული ნაწილობრივი შეზღუდვები სექტემბერში მოხსნა.

თუმცა IPC-ის პრეზიდენტმა ენდრიუ პარსონსმა ნოემბერში Associated Press-ს უთხრა, რომ მილანი-კორტინას თამაშებზე ამ ქვეყნებიდან სპორტსმენები არ იქნებოდნენ, რადგან ძალაში რჩებოდა შესაბამისი სპორტული ფედერაციების აკრძალვები.

მომდევნო თვეში რუსეთის მიერ შეტანილი აპელაციის შედეგად სპორტის საარბიტრაჟო სასამართლომ (CAS) გააუქმა საერთაშორისო სათხილამურო და სნოუბორდის ფედერაციის მიერ დაწესებული სრული აკრძალვა, ამით რუს სპორტსმენებს 2026 წლის ოლიმპიადაზე ნეიტრალური სტატუსით, ხოლო პარალიმპიადაზე საკუთარი დროშითა და ჰიმნით გამოსვლის გზა გაეხსნათ.

რუსეთის ოლიმპიური კომიტეტი 2023 წლიდან შეჩერებულია საერთაშორისო ოლიმპიური კომიტეტის მიერ ოლიმპიური ქარტიის დარღვევისთვის, აღმოსავლეთ უკრაინის ოკუპირებულ რეგიონებში არსებული სპორტული სტრუქტურების ადმინისტრაციული გზით მიერთების გამო. ეს გადაწყვეტილება ამჟამად IOC-ის სამართლებრივ განხილვაშია (მას შემდეგ რაც რუსულმა ოლიმპიურმა კომიტეტმა წესდება შეცვალა) და შესაძლოა რამდენიმე თვეში გაუქმდეს.

პარიზის 2024 წლის მოდელის მიხედვით, რუსი სპორტსმენები მიმდინარე ოლიმპიურ თამაშებზე ინდივიდუალური ნეიტრალური სპორტსმენების სტატუსით (AIN) ასპარეზობენ: ქვეყნის დროშის, ჰიმნისა და გუნდის ფერების გარეშე.

მილანი-კორტინას პარალიმპიური თამაშები 6–15 მარტს გაიმართება.

ასევე ნახეთ: დრამა, სკანდალები და აბსურდი — წლევანდელი ზამთრის ოლიმპიადა