ერაყის სამთავრობო ძალებმა ქურთი მებრძოლებისგან სადავო ქალაქ კირკუკის გასწვრივ მნიშვნელოვანი ობიექტები დაიკავეს.

გავრცელებულ განცხადებაში ნათქვამია, რომ კონტროლზეა აყვანილი სამხედრო ბაზა კ1, ნავთობისა და ბუნებრივი აირის Baba Gurgur-ის საბადო და სახელმწიფო ნავთობმომპოვებელი კომპანიის ოფისები.

ბაღდადის თქმით, პეშმერგას დაჯგუფებამ "უბრძოლველად" დაიხია უკან, მაგრამ ამავე დროს, კირკუკის სამხრეთით მომხდარ შეტაკებაზე ვრცელდება ინფორმაცია. პეშმერგა ერაყის ქურთისტანის ავტონომიური რეგიონის განკარგულებაში მყოფი სამხედრო დაჯგუფებაა.

საბრძოლო ოპერაცია მას შემდეგ დაიგეგმა, რაც ერთი თვის წინ ქურთისტანში სადავო რეფერენდუმი ჩატარდა. ერაყის პრემიერ-მინისტრმა განაცხადა, რომ ქურთების მიერ კონტროლირებად ტერიტორიაზე ერაყიდან გამოყოფის შესახებ ჩატარებული არჩევნები არაკონსტიტუციური იყო.

ქურთისტანის რეგიონალური მთავრობა აცხადებს, რომ რეფერენდუმი სრულად ლეგიტიმური იყო.

პრემიერ-მინისტრმა ჰაიდერ ალ-აბადიმ განაცხადა, რომ კირკუკის ოპერაცია "გაყოფის საშიშროების წინაშე მყოფი ქვეყნის დასაცავად" იყო საჭირო.

ჰაიდერ ალ-აბადი

ფოტო: AP / Hadi Mizban

მანამდე, ერაყის სამხედროებმა განაცხადეს, რომ მათ ასევე დაიკავეს სამხედრო აეროპორტი, პოლიციის განყოფილება, ელექტროსადგური და რამდენიმე სამრეწველო ზონა, ასევე, ძირითადი ხიდები, გზები და გადასასვლელები.

ქურთისტანის რეგიონის უშიშროების საბჭომ ბაღდადი "არაპროვოცირებულ თავდასხმაში" დაადანაშაულა და განაცხადა, რომ პეშმერგა "გააგრძელებს ქურთისტანისა და მისი ხალხის დამოუკიდებლობის დაცვა".

პეშმერგას ერთ-ერთმა წარმომადგენელმა განაცხადა, რომ კირკუკის სამხრეთით მომხდარ შეტაკებას ბევრი მსხვერპლი მოჰყვა. მისი მტკიცებით, სამთავრობო ძალებმა "დაწვეს სახლები და ბევრი ადამიანის მოკლეს".

რა ხდება ქურთისტანში?

ერაყის ქურთისტანში 2017 წლის 25 სექტემბერს ერაყიდან გამოყოფის რეფერენდუმი ჩატარდა. რეფერენდუმი ჯერ კიდევ 2014-ში უნდა ჩატარებულიყო, მაგრამ რეგიონულ და ფედერალურ მთავრობებს შორის დაპირისპირების გამო, თარიღმა გადაიწია.

სამი წლის განმავლობაში რეფერენდუმის თარიღი ბევრჯერ შეიცვალა, მაგრამ საბოლოოდ ერაყიდან გამოყოფას ამომრჩევლის 92,73 პროცენტმა დაუჭირა მხარი. საარჩევნო უბნებზე სულ რეგიონის ამომრჩეველთა 8,4 მილიონიდან 72 პროცენტი მივიდა.

რეფერენდუმი ეხებოდა ერაყის ქურთისტანისა და მის ფარგლებს გარეთ არსებული ქურთისტანის მიწების დამოუკიდებელ სახელმწიფოდ ჩამოყალიბებას.

ერაყის მთავრობამ რეფერენდუმის შედეგები არ აღიარა. ირანიც და თურქეთიც ქურთისტანის რეფერენდუმს უარყოფითად გამოეხმაურნენ. პარლამენტის გადაწყვეტილებით, პრემიერ-მინისტრ ალ-აბად აქვს ყველანაირი უფლება, რომ სამშვიდობო ან სამხედრო გზით ქურთების მიერ დაკავებული ტერიტორიები გაათავისუფლოს. მათ შორის ნავთობით მდიდარი კირკუკი, რომელიც 2014 წელს ქურთების სამხედრო ძალებმა გაათავისუფლა ე.წ. ისლამური სახელმწიფოსგან გაათავისუფლეს.

დღეის მდგომარეობით მსოფლიოში არც ერთ ქვეყანას არ უღიარებია ქურთისტანის დამოუკიდებლობა.